ORANJESTAD - Lider di MEP Evelyn Wever-Croes a bishita e edificionan bandona di Colegio Frere Bonifacius, Rosa College, Reina Beatrix School y Arco Iris Kleuterschool cu a keda lubida y neglisha pa Gobierno. A laga desaloha e edificionan basta anja pasa y a pone e alumnonan den lugarnan totalmente inadecua y den caso di Reina Beatrix School, hasta peligroso. Y Minister Michelle Hooijboer a lubida di nan. 

Ta trata di como 1000 mucha cu e minister a neglisha pasobra te dia di awe no a hasi net net nada riba e edificionan existente. "Ora bo mira e estado di e scolnan, e ta dunabo un tristesa. E decadencia ta mescos cu tur otro cos di e gobierno aki. Show y manipulacion ta mas importante cu atende cu e problemanan real di nos pais. 
Minister Michelle Hooijboer mester stop di cana hasi bunita y mester cuminsa traha di berdad. E tin apenas un anja mas como minister, y kiko ela logra pa ensenjansa? Net net nada! Ningun scol nobo! Ningun mehoracion di material of calidad! Net net nada. Y Mike Eman no ta hala su atencion, pasobra Mike Eman ta mas interesa den imagen di Hulanda cu dolornan di su propio pueblo. Mike Eman ta biaha mas cu Serafina den Jet pa asina e no mester atende cu e dolornan den nos comunidad. Nos lo yama e minister den Parlamento pa cuestiona su negligencia severo pasobra tur mucha merece mihor" segun lider di MEP Evelyn Wever-Croes.

Expresionnan haci den e articulo aki no necesariamente ta refleha opinion di ArenaPoliti.co