Andin Bikker den rueda di prensa semanal a bisa cu PDR ta hopi preocupa, cu nos ta bayendo casi pa siete aña di gobernacion, y cu practicamente eleccion pa 2017 ta acercando, y ni un cas social a wordo traha door di gobierno.

Andin Bikker a cuestiona ta corda cu gobierno a priminti cu lo bay traha mil cas social pero no ta mira un so.  PDR ta puntra si lo a  resta tereno despues cu Minister Sevinger a parti tereno entre su amigonan, entre otro sr. Rincon cu a caba di declara su mes culpable na Merca, pero pueblo mes no a haya nada.

PDR a bin tende cu e pida baranca den lama, pariba di Daimari, ta e unico cu e no a parti ainda pero tin wowo riba dje. “E realidad amarga ta cu tur dia tin cantidad di hende cu ta acudi na Parlamento cerca nos, of akinan na e sede y cu ta bisa cu nan ta na spera den un lista di miles di hende pa casnan social anto bo ta bin bisa mi cu bo tin siete aña den gobernacion, anto bo no por a traha ni un cas social?”

Na momento cu Bikker a puntra e minister e ta contesta cu nan a haci apertura di 79 cas social, pero esaki ta casnan cu nan a hereda di e gobierno anterior, segun e parlamentario.

PDR ta haya esaki hopi preocupante y ta bay sigui insisti riba e tema, pasobra nan ta haya cu no por ta asina cu e minister ta parti tereno pa loco, pa amigonan, y hasta na un persona cu a haci su mes culpable di crimennan hopi serio na Merca, y hasta el a bin na remarca den menos cu un siman pa un pida tereno basta grandi, pero pueblo mes no por constata cu tin un cas social traha pe. “Awor nos ta puntra nos mes y na e minister: pa ken bo ta traha? Pa bo mes, pa bo amigonan, of pa pueblo? Nos ta spera bo ta trahando pa pueblo, pasobra en todo caso, nos no por discerni esey, segun e parlamentario.

Expresionnan haci den e articulo aki no necesariamente ta refleha opinion di ArenaPoliti.co