Durante conferencia semanal di Partido MEP, Parlamentario Besaril a elabora riba e sentencia di hues den caso di e grupo di mayornan contra Stichting Katholiek Onderwijs Aruba (SKOA). Parlamentario Besaril a declara lo siguiente: 

"E sentencia den corte di apelacion den cual ta permiti SKOA cobra e mayornan cu a lanta caso contra e aumento di e famoso "Schoolgeld", ta un golpi mas pa Aruba su educacion. Igual cu e situacion teribel di Criminalidad y Siguridad, Educacion ta un muestra palpabel di e "Aruba di 5 Strea" cu AVP a regala su Pueblo e ultimo 7 añanan. Pero laga nos para keto un rato riba kico ta e esencia di e caso aki den corte.

Di un banda nos tin un SKOA cu no ta ricibiendo e sosten financiero necesario di parti di gobierno, por lo tanto mester busca un forma pa cumpli tanto cu su obligacionnan financiero operacional como tecnico. Na momento di menciona obligacion tecnico, mi ta referi specificamente riba aspectonan manera desaroyo y entrenamento di e maestronan cu ta den servicio di SKOA. Di otro banda bo tin e mayornan cu "de la noche a la mañana" ta haña nan confronta cu un aumento di casi 250% (di 75 pa 175 Florin) pa cada yiu cu nan tin na scol. E aumento aki ta sin conta un gasto adicional pa e scolnan cu tin airco conoci como "Airco-Geld" di 150 Florin pa aña pa cada yiu cu nan tin na scol!

E grupo mas grandi di mayornan na Aruba tin un salario cu ta menos cu 2500 Florin pa luna. Costo di bida na Aruba a aumenta drasticamente e ultimo 7 añanan y un aumento manera esun proponi pa SKOA tin un efecto devastador pa nan finanzas personal. Specialmente si nan tin dos of mas yiu ta bay scol! Ademas di e efecto devastador aki, e mayornan ta realmente preocupa y ta haci nan mes e preguntanan: "Ok, SKOA ta aumenta e schoolgeld, pero e scol cu mi yiu ta bay ....

* Ta sin cura of cura ta den un estado deplorabel, conta cu e siguridad di mi yiu na scol?
* Ta blanco di antisocialnan cu a kibra drenta e scol varios biaha, ki dia esaki ta stop of ta nos mes mester cuida e scol?
* Tin localidadnan cu no ta apropia mas pa duna les, conta cu e salud di e maestronan y e muchanan?
* No tin suficiente material pa duna les, nos por yuda, ma te con leu?
* No tin ni sikiera un cooler, esaki tambe ta na nos como mayor?
* Su bañonan ta den condicionnan masha tristo, ta nos como mayor mester bira DOW tambe? etc. etc.

E politico Mitt Romney a yega di bisa cu "Un Pais cu no ta inverti den Enseñansa, ta un Pais cu ta promove un Pueblo sin futuro!" Esaki ta suficiente pa nos di partido MEP pone Aruba su Educacion como enfoke cardinal den un proximo gobernacion. Si na Pais bisiña Corsou "Educacion Gratis" ta un realidad, anto aki na Aruba gobierno mester cuminsa asumi su responsabilidad den asunto 'ki y stop di tira tur cos riba lomba di Pueblo. Mester cuminsa brinda e muchanan di nos Pais e mesun oportunidad cu otro muchanan den Reino. Ta basta di prioriodadnan robez, ta basta di proyectonan cu no tin nos futuro generacionan na prome luga!" Parlamentario Besaril a termina.

Expresionnan haci den e articulo aki no necesariamente ta refleha opinion di ArenaPoliti.co