Sin tuma medida estilo MEP! 

Finansa di gobierno ta riba bon caminda. E deficit di aña pasa tabata 2%. 1.7% mas abou cu tabata e meta di reduccion di e deficit pa 2015. Segun CAFT no tin niun indicacion cu no lo logra e meta di un deficit di 2% atrobe na 2016. E bon di e resultadonan financiero ta cu no ta solamente e reduccion di e deficit ta bayendo manera planea. Fondonan di pensioen ((APFA y AOW) ta sigui co'i forsa atrobe, anto sin mishi cu e pensioen di e  mas cu 20 mil pensionadonan. Segun CAFT hasta sin e reaprtura di e refineria, finansa di gobierno di Aruba ta sigui bon den e añanan cu ta bin. Esaki ta confirma cu e desicion di gobierno y parlamento di AVP pa no inclui nada di e refineria den e presupuesto 2016, tabata un bon desicion. E ta bisa cu sin conta cu e posibel entradanan di e refineria, tog e maneho di finansa ta logra su metanan di yega pronto na e presupuesto balansa y despues cuminsa paga e debenan acumula den ultimo 30 aña.  E conclusion di CAFT ta cuadra cu e conclusion cu mas tempran e aña aki e compania di rating "Standard & Poors" a saca den su analysis di finansa y economia completo di Aruba. S&P e tempo ey a prognostica un "situacion positivo" pa futuro di finansa publico. Loke CAFT ta bisa ta cu e reapertura di e refineria lo duna mas espacio financiero na gobierno. Esaki ta nifica cu gobierno lo ta mas sigur ainda pa por yega e metanan pa finansa publico cu a fiha pa añanan 2013 te 2017. Rene Herde': "Awor ni CAFT ta papia di tuma medida manera e ta custumbra di haci. CAFT kier pa bo tin un paraplu cla, hasta ora solo ta halto. CAFT ta masha cauteloso den tur loke e bisa y haci. E no ta tuma niun riesgo. Ta bon ta constata tambe cu e resultado te awor ta loke a logra cu e maneho financiero di reforma cu AVP a fiha for di 2009. Den e maneho aki no tabata y no tin medida estilo MEP. Al contrario. E mehoracion di forsa di compra pa pensionadonan, trahadornan di gobierno y maestronan di scol, ta djis un aspecto di e maneho financiero economico cu a resulta di ta e miho pa Aruba sali di e crisis cu MEP a laga Nos aden y bolbe crece como pais."

OPOSICION TA SIGUI BUSCA PIEW
E reaccion mas importante di e partido di oposicion MEP riba e raport di CAFT ta cu CAFT ta menciona cu AZV si por bira un problema e aña aki. Den un reaccion riba e remarca aki, Rene Herde' di AVP a mustra cu door di cu awor ta monitor tur gasto continuamente, ta haya sa leu prome cu aña sera unda por surgi problema. AZV y gobierno tin mas cu mitar di aña pa ahusta e gastonan pa keda den e presupuesto. Pero asina mes, aki nos ta papia di gastonan pa cuido di salud di nos hendenan. E ta placa bon usa. Asina mes e maneho di e ultimo 7 aña a percura pa reduci e deficit di AZV y no ta e 145 miyon cu tabata e caso bou gobierno di MEP.

Expresionnan haci den e articulo aki no necesariamente ta refleha opinion di ArenaPoliti.co