"Ta un set di norma tin pa finansa publico. Eseynan ta poni den e ley di CAFT. No tin otro. Loke CAFT ta bisa riba proyetonan finansia den e sistema di PPP, ta un recomendacion cu nos tambe a tuma nota didje. Mescos cu ta haci uzo di sugerencianan cu bini di Banco Central, Departamento di Finansa, IMF, Standard & Poors, FITH RATINGS y otronan., ta bon ta tuma nota y tene cuenta cu e recomendacionnan aki. Pero no por bay tin un didos set di norma, ni den y ni pafo di e set di norma cu ta poni den ley." Asina Rene Herde', lider di e fraccion di AVP a bisa den e conferencia di prensa di partido AVP. E tema di un norma separa pa proyectonan di PPP a surgi door di cu CAFT ta haya cu mester fiha un norma pa esaki. 

UN PRESUPUESTO
Ta un presupuesto tin y for di e presupuesto ey tur costo di operacion di aparato di gobierno, costonan di enseñansa y di polis, infrastructura y costonan di inversionnan ta wordo paga. E normanan cu tin fiha ta conta pa henter e presupuesto y no pa un parti so. Rene Herde': "Con ta usa e placa cu pone den presupuesto y atende cu presupuesto ta un asunto di Pueblo, gobierno, parlamento di Aruba. Esey NO ta un competencia di CAFT."  Cu esey Rene Herde ta bisa cu no por bay haci cosnan pafo di e ley di CAFT. Cu otro palabra no por tin niun norma nobo of separa pa proyectonan PPP. Tur ta wordo paga for di presupuesto, pa cua tin un norma caba. Gobierno tin e responsabilidad di cumpli cu e presupuesto y e normanan financiero cu a fiha. Gobierno ta usa e placa manera poni den e presupuesto y cumpli cu leynan di nos pais. Ta den e cuadro di nos leynan gobierno tin cu traha y CAFT tambe!

Expresionnan haci den e articulo aki no necesariamente ta refleha opinion di ArenaPoliti.co