Ora CAFT papia malo ta bon segun MEP. Ora CFT papia bon, nan no ta sirbi segun MEP! 

E oportunismo y falta di un of otro liña di pensamento consistente di e partido MEP a bolbe sali na cla siman pasa. Na ocasion di presentacion di e relato anual di CFT/CAFT na Hulanda, e presidente di e comision sr. Age Bakker a declara di tin hopi confiansa den e maneho financiero di gobierno di Aruba. Ela califica e echo cu a yega na un deficit di 2% (-y kisas ainda menos-) na 2015, uno remarcabel. Obviamente algo cu ni CAFT a spera na comienso di 2015. Al contrario! CFT/CAFT mes a propone gobierno pa tuma medida na comienso di 2015 pa haya mas entrada y corta gasto. Te hasta pa manda hende cas. Gobierno y fraccion di AVP den Parlamento, no tabata di acuerdo cu e analysis y proposicionnan di CFT/CAFT. Partidonan di oposicion, MEP y PDR, algun comentarista politico, nan corant y fanaticonan, a grita cu tin mal maneho y cu un sin fin di medida lo ta na caminda den 2015. E realidad ta cu na 2015 e resultado financiero di e aña a sali positivo: e deficit a baha. A gasta menos cu a presepuesta. A baha gasto di personal sin kita hende di trabou. E deficit lo mester a yega na e norma di CAFT: 3.7% di GDP. Na 2015 ela keda hasta bou di e norma: ela yega 2% di GDP. Esey tabata djis un di e bon resultadonan di 2015. Tin mas. E fondonan di pensioen ta recuperando hopi bon di e crisis cu nan tabata aden na 2009 ora pueblo a cambia su gobierno. E fondo di pensioen di SvB ta bay crea reserva atrobe na 2017. E fondo di pensioen di trahadornan di gobierno, maestronan di scol y empleadonan di companianan di gobierno ya a yega 103% di cobertura bruto y 97% netto. E Cuenta Anual di 2014 tambe a mustra con e maneho financiero ta bayendo: a gasta menos cu a presupuesta y niun caminda a surpasa e presupuesto. Apesar di tur esey y mas, e lider di MEP a sigui grita cu e maneho financiero ta malo!

OPORTUNISMO
E partido MEP obviamente ta wordo guia estrictamente pa un gana insaciabel pa yega na poder.  No ta importa nan kico nan bisa of haci pa yega eynan. Nan no tin niun liña di pensamento cla y menos ainda constructivo riba niun tereno. Cada punto di bista ta basa riba loke casualmente sosode of cu un hende a bisa. E relacion di MEP cu CFT/CAFT ta indicativo di esaki. MEP a bay Hulanda y a topa tur instancia di gobierno Hulandes aya y aki na Aruba, pa pidi nan pa interveni den loke MEP a yama "mal maneho cu placa di Pueblo". (Un hilaridad si bo djies corda con MEP a malgasta placa di pueblo durante di 8 aña y despues laga nos pais den decadencia fisico, economico, financiero y social! Djis corda e situacion cu Aruba tabata aden na 2009.) Ora via presion y menasa illegal di Hulanda a crea un CFT temporal pa Aruba, MEP a tene fiesta. Ora e prome raport di CFT a sali na 2014, MEP a laga lesa henter e raport na radio y a invita pseudo-expertonan pa critica e maneho. Cada biaha cu CFT/CAFT a bisa algo malo di gobierno di Aruba, MEP a usa esaki pa critica gobierno di AVP. Hunto cu sr. Bosman, e amigo di MEP na Hulanda, a exigi pa gobierno cumpli cu normanan y consehonan di CFT/CAFT. MEP tabata exigi pa gobierno ehecuta e consehonan di CFTA/CAFT pa bin cu "medida pisa estilo MEP". Kier men cu pa MEP CFT/CAFT tabata semper un arma util pa bati gobierno. Pero awor cu e mes un CFT/CAFT ta djis declara cu nan tin confiansa den maneho financiero di gobierno di AVP, diripiente CFT/CAFT ta malo. Diripiente MEP ta contra di CFT/CAFT. E oportunismo barata y falta di un pensamento na fabor di nos pais, ta loke ta caracterisa tur loke MEP bisa y haci. Tristo cu MEP ta contento ora tin mal noticia di Aruba y ta rabia cu tur hende ora tin bon noticia di Aruba.

Expresionnan haci den e articulo aki no necesariamente ta refleha opinion di ArenaPoliti.co