En general, mayoria persona no ta gusta lesa un buki of documento diki. Momento esaki pasa 100 pagina, e animo y interes ta baha considerabel. Y si e ta trata di algo unda tin cu pensa of uza e cabes hopi, lubida. Pues un fenomeno hopi comun, cu tur hende conoce. Pero aki na Aruba, tin un excepcion. Nos parlamentarionan, no solamente ta bira un ‘experto y sabe lo todo’ riba tur materia momento nan drenta Staten, nan tambe a siña ‘lesa’ tur documento den algun minuut prome nan tuma un decision ‘na bienestar di pueblo’. E ultimo añanan, e tempo pa debati riba asuntonan importante den Staten, a wordo limita y mayoria di e tipo di e decisionnan asina, ta wordo tuma den madruga (ora hende ta drumi) of net prome un dia di fiesta (ora hende ta ocupa cu algo otro).

E ‘CITGO/PDVSA-deal’ ta consisti di alrededor di 2000 pagina di terminologia huridico y di un materia complica. Tambe te awe, ningun documento riba e acuerdo aki, ningun persona fuera di e team cu ta negocia y e ministernan cu a firma caba, a mira algo. P’esey e tabata hopi straño pa lesa cu un gremio petrolero declara ‘E negociacion cu CITGO ta un tremendo trabao haci’ (Diario, 28 juni 2016). Of e la bira un ‘clarivendente’ of e ta asina un bon amigo di e minister di Energia, cu a traha den refineria, a lag’e mira e acuerdo prome cu e representantenan di pueblo mes.

E minister di Energia a anuncia caba cu e acuerdo aki mester ta na vigor pa 1 augustus, mientras cu te ainda e negociacion cu e doño di e refineria, Valero, no a termina. Pues firma un acuerdo riba algo cu no tabata di gobierno, pa despues negocia cu e doño cu ta obliga pa ley caba pa cumpli cu cierto compromisonan (e Settlement Agreement), no ta logico. Den nos humilde opinion, un forma hopi cuestionabel di negocia of kisas intencionalmente haci pa asina e (ex) dunado di trabou di e minister di Energia, por wordo exonera di tur su obligacionnan. Considerando cu juli ta cuminsa e siman aki, ainda parlamento tin cu bay cu vakantie di algun siman, gobierno no a termina di negocia cu Valero y cu gobierno no a laga ningun hende wak of analisa e ‘CITGO/PDVSA-deal’ a pesar cu e ta firma caba, ta mustra claramente cu gobierno su intencion ta pa pasa parlamento un otro ‘fastball’ cu e acuerdo aki. E hustificacion lo ta e  biaha aki ‘e importancia cu e reapertura (di aki 3 aña) lo tin pa e economia’ y e cantidad di cuponan di trabou (pa stranhero). E mesun triki a wordo uza pa pasa diferente presupuestonan ficticio, e proyectonan biyonario di ‘Caminda Scur’ y e expansion biyonario di hospital. Pues con realistico e ta pa asumi cu nos parlamentarionan lo ta capaz e biaha aki, pa studia y compronde e ‘CITGO/PDVSA-deal di 2000 pagina bon?

Nos di partido ABO a bisa y lo keda ripiti cu e ‘CITGO/PDVSA-deal’ no ta ‘make good business sense’ y cu e no ta den beneficio di Aruba y su futuro generacionnan. E forma di traha un documento di 2000 pagina, ta un otro manera pa sconde hopi asuntonan cuestionabel, cu lo wordo ‘legalisa’ despues den Staten. P’esey nos di partido ABO ta recomenda pa laga e ‘CITGO/PDVSA-deal’ wordo studia y analisa pa algun experto Hulandes (y kisas Mericano) imparcial, prome cu Staten aproba e acuerdo aki. No lubida cu e aprobacion di e ‘CITGO/PDVSA-deal’, diferente claim ambiental tambe lo wordo exonera y cu e operador nobo por exclui di asumi e responsabilidad aki. Por cierto e exoneracion ambiental tambe ta un infraccion riba diferente protocol.

Si parlamento a demostra caba cu nunca e tabata capaz pa controla gobierno y cu a conduci e.o. cu awe Aruba ta bancarota y cu e ta cay bou di un control financiero di Hulanda, anto e lo ta un locura pa pensa cu awor si e lo por analisa, studia e ‘CITGO/PDVSA-deal’ di 2000 pagina, pa despues bin gaña pueblo cu e aprobacion ta na bienestar di pueblo. Gobierno mester di nan parlamentarionan ‘ja-knikkers’ pa legalisa tambe e acuerdo controversial aki, pa e ‘finder’s fee’ wordo cobra. Esaki ta e modus operandi di e ultimo añanan.

Si gobierno por a laga e asunto di refineria keda 3 aña drumi, anto e por warda algun luna mas pa laga studia kico ta e miho opcion pa Aruba. Durante henter e periodo di gobernacion, gobierno a demostra cu ningun decision tabata na bienestar di pueblo. Pues nunca e tabata sincero cu pueblo y cu gobierno no ta di confia. P’esey nos di partido ABO ta urgi parlamento pa haci e corecto y necesario porfin, pa sigui e recomendacion di nos y laga algun experto internacional y imparcial studia e ‘CITGO/PDVSA-deal’, prome parlamento sanciona un otro acuerdo controversial. Pone orguyo partidista y personal un banda y sirbi e interes di pueblo, enbes di trata gaña pueblo despues cu e miembronan ‘experto’ a studia y a compronde e ‘CITGO/PDVSA-deal’ di 2000 pagina. No lubida cu ‘Sopi pura ta sali salo’.

(www.aboaruba.org, This email address is being protected from spambots. You need JavaScript enabled to view it.)

Expresionnan haci den e articulo aki no necesariamente ta refleha opinion di ArenaPoliti.co