E no ta un secreto publico cu nos tin un ‘Stempel Parlement’. Hasta tur aña na e apertura di e aña parlamentario na september, nos parlamentarionan mes ta admiti esaki. Pero a pesar di e auto reflexion parlamentario, tur cos ta keda mescos. Hasta e ultimo aña parlamentario aki, parce cu e nivel a baha ainda mas. Hopi hende den nos comunidad ta puntra nan mes si realmente nos parlamentarionan no tin escrupulos of respet propio mas. No solamente nos parlamentarionan no ta wordo mira bon den pueblo, pero tampoco internacional. Y si esaki no tabata suficiente, hasta gobierno esun cu parlamento mester controla, no ta respeta parlamento. Awendia gobierno ta ordena parlamento cua decision e tin cu tuma y ki ora. Ta gobierno ta esun cu ta dicta ‘tekenen bij het kruisje’, y ta parlamento ta esun cu ta cumpli fielmente cu e peticion, asina legalisando corupcion y infraccionnan di ley.

Pa lunanan largo partido ABO ta publica kico y cuanto infraccion di ley y procedura ta wordo viola den e asunto di e ‘CITGO/PDVSA-deal’ y ainda parlamento ta keda sin actua of acepta gobierno crea diferente ‘smoke screen’ pa desvia di e tema. Enbes cu parlamento prohibi gobierno pa firma cualkier otro contract, y laga e ‘CITGO/PDVSA-deal’ di 2000 pagina wordo analisa pa expertonan internacional y imparcial cu si ta domina e materia aki, parlamento ta laga gobierno sigui riba e mesun rumbo di hinca Aruba den mas debe biyonario.

Algun siman pasa, nos a menciona cu gobierno a bolbe viola y mina e autoridad di parlamento, momento cu e la firma e ‘CITGO/PDVSA-deal’ na Venezuela, unda mencion ta wordo haci di un entidad gubernamental nobo ‘Refineria Aruba’, pa locual e no a haya aprobacion di parlamento pa haci esaki. Enbes cu parlamento uza e argumento aki pa anula tur e ‘CITGO/PDVSA-deal’, parlamento ta organisa un ‘bijeenkomst’.

Gobierno a regala CITGO 9 miyon florin anual, sin cu e la haya aprobacion di parlamento pa esaki, asina violando e ‘Settlement Agreement’. Gobierno ta regalando miyones y absolviendo e multinacional Valero di su obligacionnan miyonario, atrobe sin aprobacion di parlamento, pero tur fraccion ta sigui duna ‘Pabien’. Gobierno di Reino a tuma decision cu gobierno mester entrega tur documento na ‘College financieel toezicht (CAft)’ pa mira ki impacto e ‘CITGO/PDVSA-deal’ lo tin pa Aruba su posicion financiero. Pero aki na Aruba, nos parlamento no a haya ni un documento, pasobra e ta prefera pa sigui ‘kere y confia den e palabranan di señor Mike Eman’ a pesar cu ya pa 7 aña largo y tur dia ta wordo bisa cu e ‘no ta di confia’. Parlamentonan Hulandes y Venezolano ta haci nan trabou den e ‘CITGO/PDVSA-deal’. Hasta esun Venezolano, ta declara cu e ‘CITGO/PDVSA-deal’ ta contra ley Venezolano. Pero nos parlamento, parce ta mas ocupa pa haci e cumpleaño di señor Mike Eman e aña aki uno historico.

A pesar cu partido ABO a haci e trabou di nos parlamentarionan y a mustra exactamente dicon e ‘CITGO/PDVSA-deal’ mester wordo analisa y investiga prome cualkier otro contract wordo firma, ainda nos parlamento ta keda sin actua. Nos tin cu admiti cu un miembro si a uza un di nos sugerencianan, pero no pa defende e interes di pueblo y para gobierno. No, e la uza e sugerencia di partido ABO den prensa pa probecho politico. Pues confirmando asina cu e ta na altura kico e mester haci, pero a scoge e caminda di manipulacion y cobardia.

E procedura normal y cu ta wordo aplica na tur pais cu ta respeta su mes y na unda si tin un sistema democratico cu ta funciona ta, gobierno ta consulta y haya e aprobacion parlamentario prome, cu e mara e pueblo na cualkier decision financiero miyonario cu lo dura hopi aña. Aki na Aruba, e procedura ta contrario. Gobierno ta firma prome, pa despues legalisa e acuerdo den parlamento, unda e tin un mayoria, sin control y sin sancion pa despues bay gaña pueblo cu e acuerdo ta na su interes, solamente cu pueblo tin cu paga. Ki dia e abuso y e postura hipocrita anti-pueblo, lo stop?

(www.aboaruba.org, This email address is being protected from spambots. You need JavaScript enabled to view it.)

Expresionnan haci den e articulo aki no necesariamente ta refleha opinion di ArenaPoliti.co