Lider di MEP Evelyn Wever-Croes a reacciona riba e veredicto di Corte na Aruba fecha 29 juni 2016 den cual un biaha mas un hues imparcial a bati riba dede di e minister.
Hues a confirma su veredicto di februari 2016 y a bolbe ordena gobierno pa paga e suma cu falta di paga. Den su veredictonan hues a yega na e conclusion cu Gobierno su ponencia cu e proyecto di dump a fracasa, NO ta corecto. Es mas, hues a bisa cu e proyecto a funciona masha bon durante testmento y cu ta hendenan liga na gobierno mes a boycotia e proyecto. A base di esey hues a yega na e conclusion cu Gobierno mester caba di paga e desaroyado di e proyecto awor 1.8 miyon florin.

Nos di MEP ta di opinion cu minister Benny Sievinger mester wordo teni personalmente responsabel pa tur e danjo causa. Ta trata di un proyecto patrimonio di pueblo, den cual a wordo inverti 28 miyon florin. Di un dia pa otro minister Benny Sievinger a dicidi cu e ta bai tira tur e inversion di 28 miyon florin afo. Pa esaki e mester wordo responsabilisa.

Pero tambe pa tur e gastonan envolvi den ultimo 7 anjanan di casonan den Corte cu gobierno a perde TUR. E gastonan aki tambe ta algun miyon florin na abogado. Remarcable tabata cu di parti di gobierno abogado Sjiem Fat, cu por cierto ta e unico abogado na Aruba cu ta cobra 500 florin pa ora pa defende Gobierno, no a hiba ningun defensa den e caso aki.

Mas tristo di tur esaki ta cu ta pueblo mester bai paga pa un capricho di minister Sievinger, y te e dia di awe no a bin ningun otro solucion pa e sushi na dump. Si e proyecto di dump no a wordo boycotia pa minister Sievinger, awe tur sushi di cas ta wordo procesa mesora y e sero di sushi na dump lo a wordo redusi caba na mitar. Pero aki bo ta mira cu pa minister Sievinger revancha y capricho personal ta hopi mas importante cu bienestar di pueblo y un pais cu menos sushi.

Nos lo trese esaki den Parlamento pa asina tene e minister personalmente responabel pa tur danjo. Si e mayoria den Parlamento cu ta defende AVP ciegamente no sostene e sanccion aki contra minister Sievinger, esaki lo haya prioridad halto asina cu MEP drenta gobierno otro anja, lider di MEP Evelyn Wever-Croes a laga sa.

Expresionnan haci den e articulo aki no necesariamente ta refleha opinion di ArenaPoliti.co