Minister Benny Sevinger no tin ni 1, ni 2, ni 3 pero un cantidad di sentencia di huez caba den su contra. Den 2 sentencia di huez, huez a bisa Benny Sevinger cu e ta zaag na e wortelnan di nos estado di derecho.

Benny Sevinger a converti su mes den un minister cu no ta respeta maneho, no ta respeta ley y no ta respeta sentencia di huez corda pa e respeta opinion di pueblo. Tin tur indicacion cu e ta haci practinan stranjo pa enriquece su mes y su maneho ta ilustra esaki hopi cla. Tur e hendenan yega na dje ta haya tereno, tur ta haya permiso di estadia y tur ta haya kiko nan pidi contra tur regla cu ta existi riba e pais aki. Nos mester para keto un rato y puntra nos mes cuanto supermercado tin riba e pais aki, cuanto cas a wordo cumpra y a pidi Benny Sevinger un cambio di bestemming pa converti esakinan den supermercado.

Recientemente Benny Sevinger a bolbe perde un caso den corte contra e compania Bouldin & Lawson. E grupo aki a presenta un proyecto pa soluciona e problemanan di desperdicio na dump y nan a wordo boycotea pa Benny Sevinger. Nan a lanta un caso den corte y huez a dicta cu Benny Sevinger a haci su mes culpable di negligecia y a dicta na fabor di e compania Bouldin & Lawson. No solamente Benny Sevinger a costa e pais aki 27 miyon florin pasobra deliberadamente a boycotea e proyecto di dump sino awor cu e compania a gana e caso nan ta pidi un danjo y perhuicio di 2 miyon florin. A wordo proba cu Benny Sevinger por wordo teni personalmente responsabel pa e danjo financiero cu e la causa pais Aruba y ta esun mester paga esaki. No por ta asina cu su decisionan ta perhudica henter un pais y henter un pueblo tin cu paga nan anto e mes NO ta wordo teni personalmente responsabel pa e danjo cu e la causa.

Banda di e sentencia aki tin un otro caso tambe cu Benny Sevinger a bolbe perde den corte contra un grupo di inversionista. E grupo a bin cu un desaroyo di un condominium y esaki tawata situa den zona berde. Benny Sevinger tawata bon na altura di esaki y e mas cu tur otro hende, mester por sa mihor cu mester respeta e ROP (ruimtelijke ontwikkelingsplan) y no por duna tereno pa construcion commercial den zona berde. Un biaha mas e minister aki a demostra incapaz y ta actua contra tur regla y no ta tene su mes na su propio maneho. Tur e anjanan aki Benny Sevinger no a cambia e ROP kiermen e mes ta viola su propio maneho. Con un hende asina ainda tin e pudor di keda como minister mi no sa. Un cos ta ta sigur, Benny ta keda pa sirbi su propio interes, interes di su cartera, pa benta di permiso sigui y pa benta di tereno sigui. Den un proceso normal un minister manera Benny Sevinger lo mester a entrega su retiro masha dia caba. E ta haciendo hopi danjo na nos pais y a costa nos pais hopi placa!  

Expresionnan haci den e articulo aki no necesariamente ta refleha opinion di ArenaPoliti.co