Benny Nisbet (PPA): “Ejecucion di 'green corridor' ta causa hopi consternacion den pueblo di Pos Chikito!!”
![Nisbet01](/images/2016-press/Nisbet01.jpg)
E proceso bao responsabilidad di gobierno ejecuta pa e compania Colombiano cu a gana e proceso pa ejecucion di Green Coridor a cuminsa causa hopi consternacion den pueblo di Pos Chikito. Gobierno su plan ta ensera pa pasa e Green Coridor tanto parti pa ‘noord’ como pa ‘zuid’ di e caretera principal actual anto sumamente pega riba e casnan cu a custumbra di biba un bida cu hopi espacio. Na mes momento e ejecucion aki ta afecta alredor di 20/22 negoshi di funciona.
Aparentemente ta den cuadra di e plan di gobierno pa crea un espacio cu lo mester funciona den futuro como un sorto di parke of tereno dedica na recreo ‘mei mei’ di locual lo mester bira e asina jama ‘vierbaansweg’ di Pos Chikito pa Oranjestad. Por nota cu gobierno su contratista ta trahando e caretaranan sumamente pega riba e casnan cu pa henter nan existencia/bida a cosecha di e espacio amplio cu tin nan dilanti. Fuera di esaki si conta di altura di x Oduber Welding Shop pa e retonde na Post Chikito mester constata cu tin un 20 pa 22 negoshi na ambos banda di caminda cual ta ensera un supermercado, varios Bar, oficina di dokter y varios otro sitio di comercio mas cu semper nan clientenan(pueblo) por a hasi uso di espacio di parkeer amplio.
Tur cos ta indica cu gobierno su projecto no a tene cuenta cu e movicion di pueblo/commercial aki den nan planificacion di e ‘Green Coridor’. Esaki a affecta e entradanan di varios cas di famia y e espacio di parkeer di pueblo ora cu nan ta hasi nan compras necesario. Fuera di esaki tur cos ta indica cu gobierno NO a tene cuenta cu esaki cu consecuencianan dramatico pa varios negoshi y pueblo pero tambe cu peliger visible pa pueblo cu lo mester crusa caya constantemente na un caretera na e nivel di ‘green coridor’ cu peliger den esaki pa un parke mei mei construi. Aparentemente despues cu gobierno Mike Eman a mata comercio den centro di Oranjestad awor nan intencion ta pa mata e pida di comercio cresciente na Pos Chikito.
E hecho cu a pone un caretera principal asina ‘un meter’ for di casnan di famia ta demonstra e crueldad di e gobierno actual di AVP. Mas ainda cu e gobierno aki ta na altura cu e famianan aki a custumbra cu un espacio amplio den curso di anjas.
Hopi tabata e comentarionan cu PPA a ricibi di pueblo di un malcontento enorme cu e gobierno Eman y un rabia profundo pa locual ta pasando. Di con den e caso aki Gobierno no a tene un anochi di informacion pa e pueblo y comercio envolvi ta e pregunta cu kada vez nos ta tende.
PPA ta di opinion cu no ta laat ainda. Gobierno por para ejecucion di e parti aki di e projecto ‘green corridor’ y papia cu tanto e pueblo biba na Pos Chikito y e comerciantenan envolvi riba e pida caretera aki y hasi e cambionan necesario pa larga tanto pueblo como e negoshinan cu suficiente lugar di parkeer pa nan clientela.
PPA ta hasi un apelacion publico na gobierno pa mustra comprension pa e preucupacion di pueblo den esaki . Palabra ta na gobierno Mike Eman y nan ministro di infra=structura Benny Sevinger pa atende cu e pueblo envolvi envez di ‘bulldoze’ nan kier !!
Aruba, 1 di juli 2016 Lider Politico di PPA
BENNY NISBET
Expresionnan haci den e articulo aki no necesariamente ta refleha opinion di ArenaPoliti.co