Pa cuater aña caba mi ta bati alarma cu nos sistema di educacion ta perhudica structuramente e hobennan exitoso. Un hoben cu ta logra pasa door di nos sistema di educacion sin keda sinta ningun biaha, ta haya su mes confronta cu e no por sigui studia automaticamente riba un nivel mas halto. Nan ta wordo forsa pa scohe un estudio cu nan no ta gusta, bay traha y/of warda un aña pa nan tin e edad di 17 of 18 aña pa nan por sigui studia anochi.

E porcentahe di alumnonan cu ta logra caba scol basico sin keda sinta ta varia na cada scol aki na Aruba. Na www.CBS.aw ami personalmente no a logra saca e informacion aki afo. Papiando cu varios Hoofd di scol, mi a haya sa cu un average di 30% ta normal aki na Aruba. Na Hulanda nan ta yama esaki un 'atraso di edad' y despues di grupo 8 (6e klas) e atraso aki ta un promedio di 17.5% na Hulanda. Dus di cada 100 mucha cu ta caba scol basico, 18 di nan a yega keda sinta un of mas biaha. Den un klas di 25 mucha e lo ta 4 of 5 mucha. Di e grupo aki, ainda papiando Hulanda, e porcentahe di alumnonan cu ta allochtoon cu tambe tin un atraso den e idioma Hulandes, esaki ta surpasa 25%. Riba e website www.onderwijsincijfers.nl e informacion aki ta disponibel pa tur hende.

Na Aruba nos tin e situacion cu 66% di tur alumno ta papia Papiamento na cas y solamente 20% ta papia Hulandes na cas. Pero e idioma di instruccion ta Hulandes. E cifranan aki ta di Censo di 2010 y ta disponibel riba e website www.CBS.aw. Tin varios alumno cu ta yega Aruba y pavia di un atraso den e idioma Hulandes, nan no por sigui den e klas cu ta pas cu nan desaroyo personal of nan edad. Tambe nos tin e situacion cu un alumno cu ta haci 4 aña despues di dia 1 di oktober mester warda henter un aña scolar pa e por cuminsa kleuter. Atrobe, na Hulanda, manera un mucha haci 4 aña e por cuminsa kleuter. Sea esey ta na oktober, december, maart etc. Asina un mucha ta haya e oportinudad pa custumbra cu scol y e proceso di su desaroyo educativo ya ta wordo inicia.

Si nos tuma tur esaki den consideracion, bo por imagina bo mes, cu cualkier mucha na Aruba cu SI ta logra pasa door di nos systema di educacion, SIN keda sinta NINGUN biaha y ta logra un diploma di EPB, MAVO of Havo na e edad di 16 of 17 aña, cu tur scol la habri su portanan hancho habri pa e alumno aki por sigui studia riba un nivel mas halto. Un alumno asina cu ayudo di su mayornan a logra combati tur obstaculo den nos systema di educacion. Su diploma mester dunele un 'wild card' pa sigui su educacion riba e sigiente nivel.

Lamentablemente esaki no ta e caso. Varios mayor a aserca mi cu e problema aki. Mi a conversa cu un mayor cu a haya un mal sorpresa ora su yiu a caba Havo cu 16 aña y 7 vak, pero pavia di un exigencia di cantidad di puntonan cu Colegio Arubano a pone e mucha no por sigui studia na VWO! Awor a mucha aki ta warda pa wak si e por wordo 'ingeloot' na e Academisch Jaar di Universidad di Aruba of cu e tin cu busca un moda pa e bay scol anochi. Mayornan di EPB a aserca mi. Nan yiu cu tin 16 aña no por sigui riba e nivel di EPI pasobra e nivel no ta sufficiente halto y tampoco nan no por sigui na EPB. Kico e mucha aki por haci? E ta hopi jong pa bay traha of pa cuminsa scol anochi.

Un hoben cu a logra pasa door di nos systema di educacion sin keda sinta, nos mester duna nan tur sosten y regala nan un supuesto 'wild card' pa nan por sigui studia den dia. E diploma di un mucha di EPB, MAVO of Havo cu nunca a keda sinta den su carera educativo mester sa cu su diploma ta su pasport pa exito! Ya el a prueba cu e por a surpasa tur e obstaculonan cu nos systema di educacion tin. Si nos kier pa nos yiunan keda motiva pa studia, nos mester demonstra cu educacion ta conta!

Expresionnan haci den e articulo aki no necesariamente ta refleha opinion di ArenaPoliti.co