Durante e rueda di prensa di Partido Democracia Real, Andin Bikker a papia tocante e ordenanza April “Mededingings Verordening” cu desde April 2013 ta pendiente den Parlamento.

Bikker a splica cu na Ingles nan ta yame “antitrust legislation”  y netamente e ley aki ta pa trece orden y reglamenta cierto desbalansanan den un mercado incluso turismo.

Bikker a splica cu na Italia nan ta reglamenta cierto aspectonan den desbalansa pa loke ta trata turismo.

E mededingings verordening aki, den su articulo 2.8, inciso C, ta bisa cu e autoridad cu ta ordena e mercado por indica cu tin un desbalansa den e mercado y duna instruccion pa koppel cierto servicionan.

Biker a bisa cu tin demasiado servicio gekoppel na otro anto pa trece orden bek riba e mercado e ta ordena specificamente pa koppel e servicionan aki.

Bikker a bisa cu si e ley aki tabata na vigor ora cu Hotel Rio a bay cumpra su bisiña, pone un brug, concentra un cushina so, etc., cu hasta por a pensa cu personanan lo a bay perde nan trabao pasobra nan ta bay traha mas eficiente, como autoridad di e market por dicidi cu mescos cu ta sosode den otro paisnan, e compania mester tin vergunning pa maneha e mercado aki y fusiona esaki, y mester a studia e mercado pa mira si esey ta cumbini e mercado si of no.

E ley Mededingings Verordening of Antitrust Legislation nos hermana Isla di Curacao mes a adopte un par di luna pasa, y e ta algo masha normal pasobra ta un manera di regula e mercado na un forma abstracto, y hopi mas efectivo y eficiente cu no ta bay contra nos Constitucion.

E parlamentario a bolbe cuestiona cu e manera di regula e sector all inclusive concerni via un ley di higiene si ta bay contra nos constitucion.

“Mi no ta compronde e manera con e gobierno aki ta opera y mi percepcion personal ta cu nan ta sinti cu no tin suficiente poder, anto nan a laga traha un ordenanza cu no a wordo bon pensa pa consolida su poder anto e ta bay dicta kico ta bay sosode riba mercado di turismo” Bikker a bisa.

Si e ordenanza aki lo a drenta na vigor lo a trece un balansa den hopi aspecto na fabor di e consumidor, pasobra e ta pa promove e consumidor y “mi no ta splica mi mes con nan a bin traha un ley asina mal traha, haciendo mal uso di un ordenanza cu ta data di 1939, tempo cu Aruba kizas no tabata ni conoce un hotel ainda.

Pero e ta un ordenanza cu ningun hende, ora el a wordo traha, por a pensa cu ta bay use un dia pa bay drenta den e privacidad y con derecho di interveni den contratonan”, Andin Bikker a splica.

Por cierto el a bay busca e memorie van toelichting di e vergunnings verordening di 1939  cu ta prome cu nos statuut mes, pero e no por a haye, pasobra e ta un ley cu a wordo copia di tempo di Antiyas y Parlamento di Aruba nunca a yega di debati pa incorpora of introduci e vergunnings verordening aki.

Bikker ta kere cu gobierno mester busca un rato riba e website di Parlamento, e Mededingings Verordening y wak articulo 2.8 inciso C unda tin un prohibicion un poco  mas eficiente, cu si ta diseña pa deal cu un desbalansa di e mercado, cu ta bon pensa, no ta impacta y no ta contra nos Constitucion.

Bikker a haci e remarca cu AHATA a caba di conclui cu e hotel di mas grandi cu ta paga mas room tax pa Gobierno ta RIO y nan ta all inclusive, pesey e no ta compronde pakico e ley nobo cu ta contra nos constitucion.

Expresionnan haci den e articulo aki no necesariamente ta refleha opinion di ArenaPoliti.co