ORANJESTAD - Siman pasa diaranson a firma e documentonan cu Valero pa traspaso di e refineria y propiedadnan na pais Aruba. Masha hopi deliberacion, tanto na Aruba como na Merca, a tuma luga prome cu por a yega na e firmamento final. Mirando cu awor e proceso di firmamento cu CITGO y Valero ta cla, awor e ley ta bay Parlamento pa haya aprobacion pa por lanta Refineria di Aruba cu ta bay lease gran parti di e refineria cu CITGO. Un di e exigencianan fuerte cu gobierno di Aruba a pone riba mesa ta cu mester percura pa lo minimo di daño ta wordo causa na medio ambiente y pa tal motibo e refineria mester draai riba gas. Refineria di Aruba (RdA) no ta envolvi den construccion di e pipa di gas.

Mr. drs. Richard Arends a splica den un entrevista cu AD cu CITGO mes ta dicidi con e gas ta yega Aruba. E sistema segun e operador cu ta mas factibel ta esun via un pipa di gas. Arends: "Den e MoU cu gobierno di Aruba a firma cu gobierno di Venezuela ta poni cu pais Aruba ta coopera na institui un comision tecnico-huridico cu ta wak con tur cos mester cana pa construccion di un pipa entre e dos paisnan. Esaki pasobra cu Aruba no mag di wordo poni responsabel si algo pasa den suela di lama cu ta cay den nos teritorio." Segun Arends cu un di e riesgonan mas grandi cu Aruba como doño di e refineria por core ta e gastonan di desmantelacion. Pero, ainda Valero segun contract ta mara pa kita e instalacion completo, incluso tur e partinan cu ta den e subsuelo. E gastonan pa henter e desmantelacion ta wordo calcula na 150 miyon florin. Den e contract cu CITGO ta poni cu ora e compania petrolero aki bay di Aruba e mester paga mita di e suma aki. CITGO Holding Inc., e compania madre Mericano di CITGO Aruba ta para garantia pa e e suma total di 150 miyon florin. "Cu e acuerdo aki Aruba no tin ningun gasto y ta keda cu placa di loke resta di e instalacion." Semper e posibilidad teoretico tey cu CITGO no ta mantene su mes na e palabracionnan haci. Ta pesey mes cu e contractnan comercial a wordo cera bou di leynan di New York.

Arends a bisa tambe cu Venezuela ningun momento ta un partido den e contractnan y pesey no por causa ningun problema. "Nos a cera contractnan cu un compania Mericano, bou leynan Mericano. E bentaha di e acuerdo pa Venezuela ta cu e pais por bende petroleo cu pa nan ta inusabel na CITGO. Un oportunidad unico cu nan no por laga bay sin mas."

Pa Aruba e bentahanan ta grandi. Den e prome tres añanan lo haya un entrada di huur di 10 miyon di dollar pa aña. E suma aki ta bira despues 18,5 pa aña. E periodo di huur ta di 15 aña cu un posibilidad di prolongacion te cu 25 aña. Inversionnan operacional ta 400 miyon dollar y a termino corto tin trabou pa 3 mil hende y 600 den servicio permanente. E BBP ta subi cu 12,4 te 15% y caha di gobierno lo haya un entrada di minimal 90 miyon na huur y impuesto a base anual.

Expresionnan haci den e articulo aki no necesariamente ta refleha opinion di ArenaPoliti.co