Siman pasa den Parlatino nos a trata un modelo di ley caminda ta bay integra energia electrico den tratadonan di Parlatino. E ley aki ta fortifica e mesun vision cu nos como partido MEP a bin ta trese pa dilanti caba for di aña 2013 encuanto hydroenergia.  

Pa di prome, nos por a ripara den e reunionnan di Parlatino cu, por ehempel, Costa Rica ta un pais cu ya caba ta draai 98% riba energia renobabel, limpi y sostenibel. Pa ta mas specifico, e pais aki ta uza hydroenergia cu ta precisamente e mesun proyecto energetico cu nos como partido MEP a presenta na nos pueblo for di aña 2013.

Costa Rica ta un pais cu ta conta cu hopi fuente productor electrico, mirando e gran cantidad di riu cu nan tin y como tal nan tin e capacidad pa produci mas energia di loke cu nan ta produciendo caba. Pa es motibo aki, CEPAL, cu ta e organismo dependiente di e Organisacion di Nacionnan Uni responsabel pa promove desaroyo economico y social den nos region, ta guiando Costa Rica pa asina e pais aki traha combenio cu paisnan bisiña pa bende coriente serca nan.

Mirando tur e desaroyonan pa cu energia serca nos paisnan bisiña, nos por conclui cu e concepto di hydroenergia no ta uno cu nos di MEP a inventa, pero e ta algo existente caba den nos region. 

E proyecto di ley cu nos a trata na Parlatino encuanto energia electrico, ta algo cu nos por adopta aki na Aruba pa asina nos pueblo sali beneficia tambe di dje. 

Tempo cu nos di MEP a bin cu e idea pa cumpra coriente for di paisnan bisiña via un hydrocabel, di biaha partido AVP a ridiculisa e propuesta aki argumentando cu e ta imposibel pa logra algo asina pa Aruba. Pero awor cu nos ta na vispera di e re-apertura di nos refineria, di ripiente bo ta scucha partido AVP bisa cu un tubo di gas si por keda instala y cori pa asina haya gas pa produci coriente aki na Aruba.

Dus awor partido AVP ta dunando MEP tur rason den nos proposicion pa cu e hydrocabel y te hasta ta habriendo caminda pa e proyecto aki bira un realidad.

Na final di dia nos propuesta pa cu e hydrocabel ta esun mas factibel y beneficioso pa nos comunidad.

Expresionnan haci den e articulo aki no necesariamente ta refleha opinion di ArenaPoliti.co