Diahuebs ultimo, Parlamento a atende varios amienda sinembargo amienda number 7, e amienda nobo a haya mas atencion.
Sr Glenbert Croes a elabora mas ariba e amienda aki cu a wordo firma y entrega dor di lidernan di fraccion, entre otro lider di nos partido sra Evelyn Wever-Croes, lider di PDR sr Andin Bikker, Presidente di Staten y Parlamentario indipendiente, sra Marisol Lopez-Tromp y sr Rene Herde, lider di fraccion di AVP.
E amienda a wordo entrega despues cu sra Desiree de Sousa Croes a revoka su amienda cu ningun momento a hiba aprobacion y sosten di su mesun partido y di ningun fraccion den Parlamento.

“Partido MEP desde un principio no tabata di acuerdo cu e amienda di sra de Sousa Croes como cu kier a mishi cu matrimonio manera e ta ankra actualmente den nos codigo civil, cu ta entre un homber y un muher.
Partido MEP kier sigura cu esaki keda explicitamente asina y no habri e posibilidad pa otro parehanan casa y worde reconoci den nos codigo civil. Por locual nos a cera e porta ey”, sr Glenbert Croes ta bisa.

Sr Glenbert Croes ta sigui bisa cu MEP ta un partido di pueblo y pa henter Aruba sin haci distinction algun.
“Nos ta reconoce nos responsabilidad pa otro parehanan cu kier biba hunto cu otro y nos ta respeta bida priva di cada ciudadano. Nos ta reconoce cu nan mester un amparo y un posibilidad den forma huridico pa regla nan asuntonan di belasting, nan asuntonan di pensioen, di herencia y di alimentacion entre otro asuntonan.
Nos mester brinda nan un alternativa huridico pa regla nan asuntonan”.

Den cuadro di esaki a bin cu un amienda pa mustra explicitamente cu matrimonio ta keda entre homber y muher pero ta bin e posibilidad di acuerdo di convivencia pa asina brinda nan e oportunidad aki.

“Nos ta lamenta cu nos no a haya suficiente oportunidad pa asina nos informa pueblo debidamente tocante e contenido di e amienda aki. Pa motibo cu a pusha e asunto aki den pura na dado momento a bin confusionnan dor di e mal informacionnan cu a causa division den nos pueblo. Y esey nos ta lamenta di curazon”, sr Croes ta bisa.

Glenbert Cores ta asegura e tur ciudadano cu MEP lo keda sigura e pueblo cu den ningun forma a falta e confiansa cu pueblo tin den e partido pa sigura segun principionan cu e institucion di matrimonio ta keda entra un homber y un muher.

“Aruba ta un bon tata y mama cu no ta bira lomba pa ningun di su yiunan. Sin importa kico e diferencianan por ta.
Nos ta keda informa e pueblo cu e amienda cu a wordo firma ta un acuerdo conhunto cu a ricibi aprobacion y sosten di mayoria den Parlamento y no e amienda di sra Desiree de Sousa Croes.
MEP ta sigui mantene e principionan di matrimonio y ningun momento nos a defrauda e confiansa y sosten di nos digno pueblo” sr Croes ta termina bisando.

Expresionnan haci den e articulo aki no necesariamente ta refleha opinion di ArenaPoliti.co