PA MANDA UN SENJAL CON IRESPONSABEL GOBIERNO A TRATA E LEY AKI. 

E voto di Fraccion di MEP riba e amienda # 7 siman pasa a causa bastante comentario. Ta trata di e amienda # 7 cu ta duna derecho igual na un grupo den nos comunidad cu no tin proteccion, y mes momento ta percura pa e instituto di matrimonio keda un instituto entre homber y muher. 

Fraccion di MEP a vota na un forma cu hopi no a spera, nI a compronde. Cu un voto di 4 abstene y 3 na fabor, e mensahe cu MEP a duna ta importante. 

E mensahe cu e votacion ta duna ta di para pa derechonan y proteccion pa personanan cu no tin derecho ni proteccion awor. Derecho igual ta un di e principionan fundamental di nos partido MEP. Nos partido a wordo lanta pa caba cu tur discriminacion y segregacion, y nos ta mantene nos principionan tur dia na halto. 

E votacion ta basa tambe cu den e amineda aki ta cumpli cu e deseo di gran parti di comunidad pa mantene e matrimonio entre hende homber y hende muher, cumpliendo cu tur exigencia di Corte Europeo, pa ningun hues bin dicta diferente. 

Pero mes momento  fraccion MEP ta manda e senjal cu e forma con Gobierno y Parlamento a atende cu e ley aki, ta uno hopi iresponsabel. No a duna Parlamentarionan suficiente tempo pa studia tur document manera mester ta, y no a hiba e discussion social riba un cambio asina fundamental pa nos comunidad. Cu esaki nos no kiermen cu mester pone un votacion of referendum, maske esey por ta deseabel. Cu esaki nos ta bisa cu mester a duna informacion, y comunica cu pueblo. Gobierno y presidente di parlamento a forsa e ley aki, na forma hopi iresponsabel.

Y pesey nos fraccion a manda e mensahe aki cu solamente 3 a sostene e amineda, pasobra na final di dia nos ta keda social democrata, nos ta keda pone e ser humano central, apesar cu e gobierno aki no kier permiti nos hasi nos trabou na forma manera debe ser. MEP ta carga su responsabilidad, y una bes cu Gobierno di AVP a bira lomba pa un grupo desampara den nos comunidad, nos a asumi e liderasgo y percura pa ningun hende keda desampara, manteniendo nos dignidad na halto. E principionan ey hamas nos por bai contra di nan.

Fraccion mas uni cu nunca

Tur speculacion cu Fraccion di MEP ta kibra, ta incorecto. E fraccion ta mas uni cu nunca. “Nos a palabra e forma di votacion aki prome cu votacion, pues e no tabata algo sorpesivo pa ami como lider di Fraccion. Nos tabata tin consensus pa vota asina. Mi tin un respet y aprecio hopi grandi pa miembronan di mi fraccion, cu nos por a atende e tema aki na e forma aki, den union y respetando otro su opinion. Esaki ta un equipo cu di berdad tin Aruba nap echo, pero principalmente ta asumi nan responsabilidad” segun lider di MEP Evelyn Wever-Croes

Expresionnan haci den e articulo aki no necesariamente ta refleha opinion di ArenaPoliti.co