ORANJESTAD – Proyecto di Ministerio di Asuntonan General pa trece mas iluminacion den barionan di nos isla a continua e siman aki na Sabana Liber. E bisindario den districto di Noord, mescos cu esnan anterior, a prepara y warda cu hopi entusiasmo e bishita di Prome Minister Mike Eman cu personalmente ta bin yuda instala e prome luz. Personal eficiente di Elmar N.V. ta continua cu e e proyecto cu ta bay tuma algun dia mas y asina ta bay continua den otro regionnan di nos isla. 

Varios famia a bini hunto diahuebs atardi den e caya di Sabana Liber caminda a instala luz. E area ta uno basta habita, sin embargo, pa hopi decada e habitantenan tabata anhela di por tin luz publico mescos cu otro barionan. Apesar cu ta reina trankilidad, bisiñanan tabata desea di por tin mas visibilidad rond di nan cas despues cu solo baha. Tabata solamente e Gobierno di Gabinete Mike Eman II esun cu a duna oido na e peticion di e habitantenan y haci nan deseo un realidad. 

Dilanti di cas di sra. Francisca Sanchez-Farro tin un luz grandi y briyante LED cu ta bay keda lusa pa hopi tempo, alabes gastando menos energia. Varios otro bisiña den e caya tambe a yega cerca pa personalmente gradici Prome Minister Mike Eman pa e trabou balioso cu ta haciendo pa asina hopi bario rond di Aruba. No solamente cu iluminacion publico, pero tambe cu asfalt, espacionan di movecion y recreacion, terenonan deportivo y mas. 

E simannan cu a pasa, proyectonan di luz a cuminsa na barionan manera Palm Beach y Bakval. E proyecto na Sero Pela a keda finalisa, caminda por mira cu bisiñanan a keda hopi contento cu e mehoracion den bario debi na e siguridad cu e iluminacion ta trece cu ne den oranan di scuridad. 

Expresionnan haci den e articulo aki no necesariamente ta refleha opinion di ArenaPoliti.co