Lider di MEP Evelyn Wever-Croes ta decepciona den e postura di e Presidente di Parlamento relaciona cu documentonan cu ta parti di e ley cu mester wordo trata den Parlamento otro siman.

E presidente ta bruha un cos cu otro. Locual e ta referi na dje ta documentonan informativo cu gobierno por pone "ter inzage" durante reunion publico.
Den e caso aki no ta trata di documentonan informativo. Ta trata di contractnan cu ta wordo menciona den e ley, cu e ley ta referi na dje. Den e caso aki e contractnan ta parti integral di e leynan y pues gobierno mester duna Parlamento nan.
Keda sin duna Parlamento documentonan y stroba Parlamentarionan di hasi nan trabou ta actonan castigabel y condenabel den un estado di derecho.

Mi ta lamenta cu e presidente di parlamento ta bruha cos asina djis pa defende gobierno. Su tarea no ta defende gobierno, su tarea ta defende parlamento.
Ademas, e ta pasa awor pa un hende cu no sa su trabou y esey mi ta lamenta pasobra tempo MEP tabata den gobierno y e tabata presidente di parlamento si e tabata sa su trabou; acaso ta asina liher el'a lubida su trabou?

Mientras tanto mi a ricibi e documentonan, no via gobierno sino den mi brievenbus. Y den e documentonan no tin nada confidencial. Hasta tin autorisacion pa duna Parlamento nan. Bo no mester ta hurista pa compronde esey y e Presidente di Parlamento mes por a constata esey, sino e por a pidi conseho na Griffier cu si ta un hurista.
Sinembargo ta obvio cu e unico interes ta pa sigi instruccion di gobierno y di lider di fraccion di AVP. E no a actua den interes di Parlamento sino den interes di gobierno y di AVP so. Mi a keha esaki caba den henter Reino y mi lo sigi keha e dictadura aki den futuro tambe. Y mi ta lamenta pasobra mi a duna sra Wyatt-Tas beneficio di duda, pero e Presidente di Parlamento aki a skibi e pagina mas scur di historia di nos democracia. Y e consequencianan, ta e mester bai biba cu nan.

Expresionnan haci den e articulo aki no necesariamente ta refleha opinion di ArenaPoliti.co