Un gobierno di AVP cu debe y mas debe! 

Hopi hende a keda asombra y no por a kere ora cu algun siman pasa e noticia tabata core cu gobierno debe e fondo di pensioen APFA un suma astronomico di 900 miyon florin. E informacion aki a ser treci padilanti den e encuentro cu APFA a tene cu su miembronan dia 31 di augustus ultimo den Cas di Cultura. Sinembargo for di e relato anual 2015 di APFA a bin resulta cu e debe total di gobierno na APFA enberdad ta un suma astronomico y cu esaki a yega na 819.5 miyon florin na fin di 2015. Si haci un comparacion, na final di gobernacion di AVP na 2001 tambe gobierno a conoce un debe total di 277.1 miyon na APFA y nos tur por corda ainda con e tempo ey tur hende a haya cu e suma aki ta sumamente halto. Pero kico nos mester bisa awor cu e debe aki na APFA a yega 819.5 miyon florin na 2015 y di cual e mayoria di debe ta hinca den fiansa y bononan di gobierno? Claramente nos por mira cu Gabinete Eman no ta importa cuanto debe nan ta haci, pero tur caminda cu nan por pluma e morocoy, nan ta haci esaki, sin ningun tiki di gevoel y consenshi. 

Medidanan contra ambtenaarnan 
Alavez no ta falta un dia cu e integrantenan di AVP den coro ta grita cu ta Gabinete Eman a salba e fondo di APFA, pero nan no ta conta e resto di storia di tur e medidanan cruel cu nan a impone riba lomba di e participantenan di APFA: 
1) Nan a aumenta e edad di pensioen te 65 aña. Cu e medida aki e pensionadonan lo perde di haya un suma substancial di nan pensioen y cual suma lo keda den e fondo, 2) Nan a introduci franchise y middelloonregeling cu consecuencia cu e participantenan lo haya un reduccion den nan pensioen y cu ta bay den caha di APFA, 3) Nan a reduci e Duurtetoeslag di e ambtenaarnan for di 36.1% te cu 17.7%, consecuentemente un reduccion substancial di nan pensioen y cual suma tambe lo keda den caha di APFA, 4) E franchise a ser aumenta for di 14059 florin te cu 17616 florin y e porcentahe di acumulacion di pensioen a ser baha di 2.15% te cu 1.75%. Pues aki tambe mas placa lo keda den fondo di APFA. Tur e medidanan aki ta haci cu e empleado publico cu awe ta entrega mas lo haya menos den futuro.

Negoshi cangreu
No mester lubida tambe cu na 2014 Gabinete Eman a hinca 170 miyon florin den APFA y p’asina por yega na un porcentahe di cobertura di pensioen di 100%. Pero aki tambe nan kier manipula mente di pueblo, ya cu e suma di 170 miyon florin nan a fia for di e propio APFA y pa APFA directamente hinca esaki bek den su fondo. Finalmente cu e negoshi cangreu aki Gabinete Eman a bolbe crea un debe di 170 miyon florin extra cerca APFA y pa cual henter comunidad tin cu paga e debe aki. Mester remarca si cu hincando e suma di 170 miyon florin toch nan no a logra di yega na un cobertura netto di 100%, pero a yega na solamente 95.4% y cu segun e plan di recuperacion lo dura 15 aña prome cu por yega na e cobertura di 100%. Pues Ainda Falta! 
Finalmente, cu tur e pruebanan aki treci pa MEP mester ta bisto pa un y tur cu ta e participante y pensionadonan di APFA mes ta trahando pa haci e fondo mas solido y cu Gabinete Eman t’ey  solamente pa crea debe y mas debe cerca APFA y tur otro caminda cu nan por fia sin limite.

Expresionnan haci den e articulo aki no necesariamente ta refleha opinion di ArenaPoliti.co