AVP mester ta sincero cu pueblo y papia e berdad! 

Un di e fondonan social cu exponentenan di AVP diariamente ta manipula mente di pueblo cun’e ta cu ta nan a logra salba e fondo di Seguro Medico General (AZV). Sinembargo mescos cu ta e caso di e fondo di APFA, aki tambe Gabinete Eman den trancusro di e ultimo añanan a impone un cantidad di medida cruel riba lomba di e aseguradonan pa supuestamente salba e fondo aki: 

1. A aumenta e prima di AZV cu 1% entrante 1 di januari 2011
   
   
2. A aumenta e BBO cu 1% pa AZV (BAZV) entrante 1 di december 2014
   
   
3. A bolbe aumenta e BBO cu 1% pa AZV (BAZV) entrante 1 di juli 2015.
   
   

Pues den total Gabinete Eman a impone 3% di aumento di prima pa henter comunidad y te hasta  e turistanan cu ta bishita Aruba, nan tambe tin cu paga BAZV, sin por ricibi servicio medico a cambio. Alavez e aseguradonan di AZV tin hopi menos beneficio, ya cu nan ta ricibiendo solamente remedinan generico y e tempo di espera pa servicio di specialista, testnan di laboratorio, operacion na hospital dia pa dia ta birando alarmante. Pues aki tambe ta e mesun adagio pa e aseguradonan di AZV: Contribui cu mas y pa haya menos!

Echo ta cu e gabamento constante cu ta Gabinete Eman a logra salba e fondo di AZV ta un otro mentira flagrante di e politiconan di AVP y esaki ta bin padilanti den e relato di CAFT di 26 di augustus 2016 dirigi na Minister di Finanzas Bermudez. CAFT ta señala cu e resultadonan di AZV durante e prome 6 lunanan di 2016 ta mustra un deficit di 0.4 miyon florin y nan ta premira cu pa henter aña 2016 e deficit lo acumula y yega 16.1 miyon florin. Tur esaki pa motibo cu Gabinete Eman – fuera di impone e medidanan cruel riba lomba di e aseguradonan – constantemente ta reduci e contribucion di gobierno na e fondo di AZV. Pues manera semper Gabinete Eman kier spaar di su contribucion pa e fondo di AZV y p’asina nan por keda cu mas placa pa nan viahenan rond mundo, na coordinador y pensionadonan modelando rond di e ministernan y pa no lubida tur e locuranan di green. Echo ta cu no ta ningun arte pa goberna di e forma mediocre aki, esta di crucifica e aseguradonan cu tur e medidanan cruel y pa despues cana rond y pretende di ta e gran salbadornan di e pais aki.

Expresionnan haci den e articulo aki no necesariamente ta refleha opinion di ArenaPoliti.co