ORANJESTAD – Lider di MEP sra Evelyn Wever-Croes ta elabora rib’e situacion masha particular cu tin na Aruba cual ta e manera cu Gobierno di AVP ta maneha e placa procedente di turismo.

Manera nos sa solamente tin un pilar economico na Aruba cual ta turismo. Y entradanan cu ta bin directamente for di turismo ta bay den un solo ministerio, cu ta e Ministerio di Turismo. Siendo cu turismo ta un pilar economico di nos tur.

Sra Wever-Croes ta puntra: “Si turismo ta di nos tur, dicon no ta nos tur por probecha di e beneficionan di turismo? Dicon Ministernan di otro ministerionan mester mendiga pa haya placa di turismo?”

Ora un turista yega Aruba, su prome contacto ta cu Inmigracion. Y su prome impresion lo ta uno bon si e wordo atendi na forma cordial y lihe. Esaki ta cay bou di e responsabilidad di Ministerio di Husticia.

Despues e turista ta pasa Aduana y kico miho cu un trato bon y rapido na Aduana. Esaki ta cay bou di responsabilidad di Ministerio di Finansas.

E turista siguientemente ta subi su taxi y su experiencia lo ta uno bon y agradabel si e ta core riba careteranan bon manteni. Esaki ta e responsabilidad di Ministerio di Infrasructura.

Ora e turista yega hotel, e lo keda impresiona si e Bell-boy ta papia 4 idioma. Esaki ta e responsabilidad di Ministerio di Enseñansa.

Despues di “check-in” e ta bai saboria un dushi pisca den un di nos restaurantnan y naturalmente ta confia cu normanan di higiene ta wordo cumpli cu ne. Esaki ta e responsabilidad di Ministerio di Salubridad.

Y finalmente despues di su cena, e ta cana bay bek su hotel den confiansa cu e area ta sigur. Responsabilidad di Ministerio di Husticia.

“Turismo ta di nos tur. Y ta nos tur ta haci turismo un exito. Awel, dicon e ora Ministernan mester bay roga cerca nan colega Minister di Turismo pa haya poco placa pa mehora servicio na Imigracion, Aduana, Polis y otro departamentonan? Dicon mester bay roga na Minister di Turismo p’asina trece siguridad na nos pais?,” ta preguntanan cu sra Wever-Croes ta haci n’e Gobierno aki.

“Ta na Aruba so nos conose e fenomeno cu tur placa di belasting di turistanan, nos unico pilar economico te ainda, ta bay pa un solo ministerio y demas Ministernan mester bay roga serca dje”.

Sra Evelyn Wever-Croes ta sigui bisa: “Esaki ta un vision fracasa di Gabinete Mike Eman. Partido MEP a opone esaki desde un principio. Desde e dia cu Mike Eman a bin Parlamento pa cambia e ley y laga tur e placa procedente di turismo bay den man di un solo Minister. Y awe MEP ta bolbe haya rason. Pasobra claramente bo ta mira cu e vision aki di Gabinete Eman no ta funciona. Pasobra no tin placa pa haci Aruba mas sigur. No tin placa pa Enseñansa. No tin placa pa Salubridad. Tur ta bay den man di un solo ministerio”.

“Den vision di MEP nos lo coregi e eror aki y nos lo percura pa placa di belasting bay bek den caha di Gobierno. Naturalmente mester di un fondo apart pa mercadeo di turismo. Esaki lo bay ta aloca den un fondo separa, pero no na e forma manera e ta acutalmente. Ora ta trata di belasting, e placa ta bay den caha di Gobierno”.

Sra Wever-Croes ta termina ta bisa: “Pasobra Aruba merece miho! Nos ta crea turismo hunto. Y hunto tambe nos mester hiba e pais aki pa dilanti”.

Expresionnan haci den e articulo aki no necesariamente ta refleha opinion di ArenaPoliti.co