ORANJESTAD – Prome Minister Mike Eman hunto cu su colega di Infrastructura Benny Sevinger tabata pendiente for di prome momento cu a anuncia formacion di un mal tempo cu lo por pasa hopi cerca di Aruba. Nan a atende reunion cu diferente instancianan envolvi den sector di calamidad, pero tambe a bishita areanan cu normalmente ta wordo afecta pa yobida pisa, pa mira si Aruba ta prepara pa deal cu un mal tempo. Despues di e mal tempo a bolbe subi caya pa mira cual ta e dañonan cu a sufri y analisa posibel medidanan cu mester wordo tuma.

Despues di pasada di horcan Matthew, Aruba a wordo afecta pa algun dia pa e “swelling” di lama cu a suta e beachnan di Aruba. Prome Minister Eman den e recorido na tres area cu a wordo basta afecta, a keda sorprendi cu despues di a surpasa horcan Matthew a mira un impacto mas grandi cu e “swelling” cu a surgi despues. “Lama a lanta cu un forsa feroz, cu olanan basta grandi cu a causa hopi daño na e costa di Aruba, cuminsando for di Divi Tamarijn yegando te  Arashi,” Eman a bisa na final di e recorrido. Y a agrega cu asina cu e sistema a calma, Departamento di Dow a cuminsa inmediatamente haci limpiesa di e beachnan.

Cu e bishita den e siman aki, e mandatario a bisa, a keda constata cu e trabou pa reconstrui e beachnan a bira hopi mas grandi. “Pero nos ta prepara pa esey. Nos recorido tabata pa haci un evaluacion di tur loke mester tuma luga asina cu e lama baha." Loke Prome Minister Eman a bisa tambe ta cu dilanti Divi Tamarijn ta bay construi unmuraya pa protega e hotel y e beach contra olanan halto y aumento di nivel di lama. “E ta un  hotel bastante vulnerabel pa ora cu lama lanta, pesey mester di un proteccion mas structural. Nos a combersa esaki cu sr. Alex Niewmeyer tambe.” Pa loke ta e otro hotelnan, lo traha di cerca cu nan tur, pero den mayoria caso naturalesa mes lo percura cu e beachnan ta bay den nan estado original. Den caso cu ta necesario, Gobierno lo yuda cu santo blanco pa pone e beachnan mas lihe posibel operacional atrobe.

Prome Minister Eman na Tamarijn a papia cu algun empleado y a mira cuanto daño por ehempel un di e restaurantnan a sufri, unda cu un parti di dje a cay den lama. “Esey ta trece preocupacion cerca empleado  y doñonan. Pero tabata interesante pa mira cu e turistanan kedando den e hotel a demostra hopi comprension. Esey ta reduci nos preocupacion pasobra nan ta compronde cu esaki ta un acto di naturalesa, ademas cu hopi di nan ta bishitando Aruba pa hopi aña caba. Nan tin recuerdonan bunita di tur nan vacacionnan na Aruba,” Eman a expresa.

Expresionnan haci den e articulo aki no necesariamente ta refleha opinion di ArenaPoliti.co