Awor cu e tormenta/orcan Mathew a pasa un dos cien kilometer Noord di Aruba….e consecuencia tabata bastante dramatico pa nos beachnan cu ta no solamente nos orguyo arubiano  pero tambe nan ta e motibo real di nos industra turistico. Diferente beach rond di nos isla a worde seriamente affecta pa e olanan y un lama bruto. Tin beach cu a perde tur e santo blanco y tin otro cu a worde seriamenta susha. Te cu diferente instancia ta hasi un jamada na pueblo pa bin juda drecha y limpia e beachnan aki locual PPA ta sostene.  

PPA ta hanja e desaroyo  natural  aki uno lamentable pero manera nos ta bisa e ta uno natural pa cual poco por worde hasi pa limita danjo na beach ora sea un tormenta of un orcan  pasa.  Sinembargo PPA kier hasi uso di e momento aki pa pone atencion riba consecuencia den futuro di locual ta worde jama ‘rising sea levels’ esta aumento di e nivel di lama cual ta consecuencia di  e cayente/temparatura di  lama  pero tambe consecuencia di  e  ‘smeltmento’  di  ijs cual ambos ta contribui na aumento di e nivel di lama !

Na e momento aki pueblo ta tristo pasobra  e  fenomeno natural  ‘Matthew’ a affecta nos beachnan seriamente ( ainda tin posibilidad pa sea hasi e beachnan sushi  limpi)  of sea gobierno of naturaleza mes lo contribui pa crea beach bek door di pone e santo blanco bunita atrobe.

Pero pueblo mester ta consciente cu e fenomeno di ‘rising sea waters’/ hizamento di nivel di lama  lo tin como consecuencia cu si ora e lama aumenta e ta aumenta pa keda y consecuencia lo ta cu un pida substancial di nos beachnan of nos costa  por disparse  anto bao awa  ‘pa semper’ !!

Pesey PPA como unico organisacion politico  ta hasi un esfuerzo pa conscientisa nos gobierno, nos parlamento y nos pueblo di e posibel consecuencianan di ‘rising sea levels’. PPA a jega di cita for di documentonan international dI Nacionan Uni cual ta indica cu e sitionan na mundo unda lo por tin ‘rising sea levels’ e.o. den cual  mar Caribe tin un oportunidad unico pa ejerce cierto  trabao pa ‘limita e danjo’ cu lo por  sosode den futuro.  Y PPA ta accentua …..’limita e danjo’….pasobra cierto parti di e  danjo causa pa naturaleza  tur pais na mundo lo mester biba cunele.

No ta por nada cu ja ta 10 anja cu otro pais den Caribe junto cu Universidad reconoci na mundo a hasi  estudio  basa riba cual e paisnan aki a puntra Naciones Unidas pa un contribuiccion financiero pa ejerce  cierto trabao pa limita e posibel danjo. Aki na Aruba ta parce cu Aruba ta riba un otro planeta. Ta solamente na un occasion nos Min Pres Mike Eman a declara cu Aruba tambe ta core risico pisa …esey tabata durante e conferencia na Paris, Francia durante cual e declaracion aki a cai. Sin embargo despues di regreso di Min Pres Mike Eman for di e conferencia aki y despues di algun luna  cu el a bai New York bai firma e acuerdo cu tur e paisnan a jega na djele….pueblo di Aruba NO a tende nada pero nada mas di parti di gabinete Mike Eman riba e materia aki.

Lucha di PPA ta pa e topico aki worde poni riba e  ‘agenda nacional’ di nos pais. Cu riba nos presupuesto worde postula fondo pa por ejecuta un maneho pa limita e posibel danjo den futuro.

Sin  beach Aruba No por brinda  turismo na e nivel y e forma cu Aruba a bin ta hasi esaki desde cu PPA na 1959 padilanti a cuminsa prepara pa inverti den nos industria di turismo. Sin beach …e locual ta atrae tanto miles di turista pa anja pa bishita nos lo a  disparse y PPA ta lamenta cu gobernacion di diferente signatura no a dedica atencion debido na e problematica aki.

Pesey un vez mas …..na e momento aki cu Pueblo ta sinti e dolor cu  tormenta/orcan Matthew a causa na nos ‘beachnan’ PPA ta sinti ta e momento a jega  pa accentua e problematica aki hopi fuerte…pa un y tur realisa e importancia di nos beachnan y cu gobierno lo mester tin un maneho pa minimalisa e danjo cu ‘rising sea waters’ lo por trece den futuro.

Sperando cu mensahe di PPA ta uno importante pa henter nos pueblo di Aruba !!

Aruba, 6 di oktober 2016
Lider Politico di PPA 
BENNY NISBET

Expresionnan haci den e articulo aki no necesariamente ta refleha opinion di ArenaPoliti.co