Pueblo lo por imagina nos Isla stima Aruba sin ‘beachnan’ ??? Sin e santo blanco cu ta forma e buniteza di nos beachnan? Un par di siman atras nos a hanja un ejempel ora varios beach a sufri consecuencia di e pasada di locual a bira ‘orcan Mathew’. PPA a publica un articulo unda nos a accentua e problematica di ‘rising sea levels’ esta aumento di e nivel di lama pa hala atencion di pueblo ainda mas riba e problematica aki. PPA ta sinti nos mes jama pa pone mas atencion riba e problematica aki ! Como cu ni gobierno ni parlamento no ta dedicando atencion serio na e problematica aki.

Durante e conferencia international na Paris, Francia, na December 2015 tabata prome vez cu Min Pres Mike Eman a admiti y declara cu Aruba tambe ta core peliger serio pa cu e problematica crea pa e ser humano den curso di tempo aki. Lamentablemente despues di su regreso for di e conferencia aki pueblo no por a tende ni sinti un maneho dedica pa prepara Aruba y/of pa limita e posibel danjo cu Aruba lo por hanja den futuro. Min Pres Mike Eman a viaha si pa New York na Naciones Unidas pa firma e acuerdo cu paisnan a jega na djele na Paris, Francia.

Nos conclussion ta cu Min Pres Mike Eman ta usa e problematica di cambio climatologico como un show pa su persona pero no tin e minimo atencion di prepara Aruba pa esaki. Pa colmo gobierno di Min Mike Eman (AVP) a presenta un projecto na parlamento pa ‘transforma’ nos refineria den un asina jama Upgrader. Upgrader ta conoci den mundo pa larga un ‘footprint’ hopi pero hopi mas dramatico cu un refineria. Upgraders ta procesa e ‘extra heavy crude tambe jama ‘tar/lodo’ of ‘bitumen’ cu ta saca hopi pero hopi mas CO2 cu refineria y upgraders ta produci un 30 % mas di locual nan procesa na ‘waste products’ esta ‘petroleum coke/pet coke’ y sulfur. Aruba a tuma pues un paso linea recta contra locual Aruba a juda negocia na Paris, Francia y a firma na Naciones Unidas esta na New York, USA. E storia cu paisnan a comprende pa Aruba PPA no ta kere aden. Aruba mes no a comprende pa su mes teniendo na cuenta kiko ta un Upgrader y den kiko Aruba a hinca su curpa. Ta algun persona realmente sa y ta comprende y nan no ta biba na San Nicolas y nan lo NO traha den e veld di e Upgrader.

Pa PPA ta incomprendible cu un gobierno cu ta pretende di sirbi su pueblo ta keda sin larga hasi un estudio profundo di kiko e posibel consecuencia pa Aruba lo por ta ….si lama hisa cu 1 meter den futuro cercano (?) y tin instancia internacional ta projecta 1,5 meter. Aruba ta forma parti di Reino Hulandes den cual Hulanda ta conoci como e pais den mundo cu ta biba bao di e nivel di lama….Hulanda ta ‘consultant’ pa hopi pais rond mundo y ta juda proteha e paisnan aki contra e nivel di lama cu ta aumenta poco poco pero sigur. Hulanda ta juda e.o. Colombia, Vietnam y mucho otro pero no ta saca un dede pa juda su propio ‘partnernan’ den Reino. Cu tanto pleito rond di KB, entrego di autonomia y ultimo e proceso di nombra un gobernador PPA no por comprende cu si kier duna contenido real na Reino Hulandes……Kiko ta e dolor pa larga RijksWaterstaat hasi un estudio di nos lama caribense …con e ta affecta e islanan ABC/SSS y pa nos e isla di Aruba y kiko lo por ta e consecuencia pa nos pais ? Unico conclusion di PPA ta cu gobernacion di AVP ta consciente cu conclusion di un estudio asina lo nifica cu Aruba lo mester pone fondo riba presupuesto pa cuminsa inverti den locual ta necesario pa limita e posibel danjo den futuro y un maneho asina lo demonstra cu e ‘deficit’ di pais Aruba ta mucho mas cu hopi hende ta kere.

PPA den pasado a manda un carta pa gobierno di Reino copia pa 1e y 2e kamer pa hala atencion riba e problematica aki pero a hanja como contesta cu esaki ta parti di nos ‘autonomia’ y Aruba su gobierno tin cu tuma e iniciativa pa esaki no Hulanda. Contrario na esaki si ta con Hulanda a pressiona Aruba/gab Mike Eman pa Aruba entrega un parti substancial di nos autonomia financiero. Y Hulanda ta hincando su boca pa medio di C.A.F.T. (situa na Corsow !) den e maneho financiero di Aruba pero pa larga RijksWaterstaat hasi un estudio…..esey si ta nos ‘autonomia’…….’Het kan verkeren’ manera e Hulandesnan sa bisa.

ECONOMIC COMMISSION FOR LATIN AMERICA AND THE CARIBBEAN..!

Un instancia cu ta cai bao di Naciones Unidas si a jega di hasi un estudio riba posibel danjo cu lo por worde causa na Aruba. Un estudio cu lo mester a sirbi como un ‘eye-opener’ cu a hiba e titulo “An assessment of the economic impact of climate change on the Tourism sector in Aruba” tene cuenta cu e estudio aki ta dedica na e impacto di cambio climatologico riba e sector di Turismo y no a haci kiko e efecto lo ta riba e pueblo mes of otro sector di gobierno cu por worde affecta pa ‘aumento di nivel di lama den futuro un estudio mucho mas profundo lo aumenta e danjo ainda hopi mas.

PPA lo cita un conclusion for di e assessment aki:

“The total figures (table 12) show that Aruba has to take some decisive and positive actions within the tourism sector to help with the reductions of these future costs, which are amounting a considerable US $ 12 billion under the A2 scenario and a US $ 13 billion under the B2 climate scenarios. In each of these cases the results represents an annual loss of between 1.5 % - 2 % of Aruba’s GDP until mid century”

Nunca nos no a tende gobierno realmente dedica atencion na e ‘estudio’ aki y tampoco nos no a tende miembro di parlamento cuestiona gab Mike Eman relaciona cu e problematica di ‘rising sea levels’ y specificamente e locual e estudio aki ta referi na djele.

Mientras tanto tempo ta pasando…….Si e islanan ingles a larga hasi un estudio entre un grupo di trabow di nan y Universidad di Oxford…cual estudio a worde entrega y a senala consecuencia ‘dramatico’ pa e Islanan den Caribe ……e estudio aki mientras tanto a worde usa pa ‘Naciones Unidas’ subsidia e Islanan aki anualmente pa nan por inverti den un maneho pa limita e posibel danjo di futuro….Inversion den planta Mangrove…..inversion den hisa tur caretera den cercania di lama cu 1 meter…….inversion den construi ‘dijk’ na cierto sitio y mucho mas.

Pero aki na Aruba nos pueblo a keda visiblemente affecta ora a pasa rond di Aruba despues di e pasado di orcan Mathew……..un par di beach visiblemente y seriamente affecta. Pero nos pueblo, nos gobierno y nos parlamento mester realisa cu ora ta trata ‘rising sea levels’ una vez cu e lama aumenta ….bo por hasi masha poco pa no bisa nada mes mas……..!! E palabra importante den e caso aki ta cu TEMPO……e tempo valioso pa larga hasi estudio……pa analisa kiko lo por ta e consecuencia pa Aruba……di kiko lo por ta e accion/projecto cu lo mester inverti den djele….etc….. Ta e tempo ey nos ta larga pasa bai pasobra nos gobierno no tin problema pa duna ‘show’ den mundo pero visiblemente tin problema pa tuma accion pasobra esey lo aumenta e ‘deficit’ riba nos presupuesto. Cruel senores….hopi cruel …..anto asina ta pretende di ta un gobierno/parlamento cu ta stima nos pueblo ta representa nos pueblo anto ta preucupa pa un miho futuro pa nos generacionan cu lo sigui nos.

PPA lo sigui pone atencion riba e problematica aki !!

Aruba, 29 di oktober 2016
Lider Politico di PPA
Benny Nisbet

Expresionnan haci den e articulo aki no necesariamente ta refleha opinion di ArenaPoliti.co