Vakantieuitkering, Voorjaarspremie, Gelijkbedrag y Indexering: 

Ta parce cu desde cu Gabinete Eman a sinta na 2009 ta un estafette bruha tin entre e politiconan di AVP cu nunca por a wordo gara ta papia e berdad, pero constantemente ta venena mente di pueblo cu nan mentiranan sin limite. Y awor siman pasa a toca turno na Melvin Tromp pa papia di pobresa na Aruba, caminda el a declara entre otro cu “MEP a drenta gobierno y a vries indexering mesora, a vries vakantieuitkering y riba dje a tuma un cantidad di medida contra pueblo”. Aki nos di MEP mester constata un biaha mas con limita e capacidad di e parlamentario di cabey boto aki ta, ya cu locual el a declara ta un di su tantisimo mentiranan flagrante. 

Herencia di debenan di AVP 
Hecho ta cu ora Gabinete Oduber a sinta na 2001 nos a hereda un situacion financiero desastroso, un deficit astronomico y debenan (‘claims’) di mas di 800 miyon florin y esaki contando solamente e proyectonan corupto y fantasma manera e Garantianan di e hotelnan den ruina cu segun sentencia di Corte Internacional na Den Haag e debe aki mester wordo paga inmediatamente na SACE. Tambe otro proyectonan corupto y fracasa, manera Race Track , Fondo Desaroyo San Nicolas, Radar, Radisson, Winston & Strawn etc. Y tabata hustamente  den e ambiente di caos y bancarota financiero aki cu Gabinete Oduber mester a cuminsa goberna, caminda mester a haci sacrificionan grandi pa logra paga tur e debenen aki cu e partido di Melvin Tromp a laga atras na 2001. Sinembargo asina mes den e situacion precario aki causa pa e gobierno di AVP, Gabinete Oduber a keda paga tur e 8 añanan e ambtenaarnan nan Vakantieuitkering. Pues nunca a vries esaki manera cu Melvin kier venena mente di pueblo. 

Mas beneficio salarial
No mester lubida cu tabata e gobierno di MEP na 2002 a introduci e Voorjaarspremie cu a yega te 884 florin y despues tambe e Gelijk Bedrag di 1250 florin. Tambe desde 1 di januari 2008 e ambtenaarnan a cuminsa goza di Af. 105,00 extra den nan salario y esaki pa compensa e aumento di costo di bida. Pues cu tur e pruebanan presenta aki pa MEP ta mas cu bisto cu Melvin Tromp a converti su mes den un politico supermentiroso cu ta come y lubida, ya cu si e bay check den su payrollnan bieu e mes lo ripara cu e tambe a goza di tur e beneficionan menciona durante e gobernacion di MEP. No solamente esey, pero na 2007 Gabinete Oduber a reduci substancialmente e tarifanan di inkomstenbelasting, caminda por ehempel tur trahador – tanto den gobierno como sector priva - cu ta gana por ehempel 30 mil florin pa aña (2500 florin pa luna) a haya 108 florin extra den nan salario. Lo ta bon pa Melvin Tromp dal un check den e tabel adhunto y mira pa su mes cuanto placa extra el a cobra tur e añanan!

Un miserabel Reparatietoeslag
Adicionalmente tur e trahadornan den sector priva durante gobernacion di MEP a haya un aumento di salario minimo di 431 florin, esta for di 1112 florin na 2001 te 1543 florin na 2009. Bao di Gabinete Eman durante 7 aña e salario minimo a aumenta cu un awa di bida di 135 florin, esta for di 1543 florin na 2009 te 1678 florin na 2016. Y awe cu gobierno di AVP ta duna algo adicional di un miserabel reparatietoeslag na e trahadornan, tur dia Mike Eman ta keda tira den nan cara cu ta su persona ta e bon Samaritano cu ta duna nan e suma aki!
No mester lubida tambe cu durante gobernacion di MEP a aplica pa tur trahador e ‘inflatie correctie’ cu a yega na un total di 18.7%. Awe Gabinete Mike Eman a kita e derecho fiscal aki cu tabata na beneficio di henter comunidad. Alavez Gabinete Eman a percura pa individualisa e prima di AOV pa parehanan casa. Door di e medida aki e parehanan desde 2011 no ta haya nan acostumbrado restitucion mas cu ta core entre 4000 te 6000 florin pa aña.
Asina pues partido MEP un biaha mas a desenmascara tur e mentiranan ventila pa Melvin Tromp y ta corigi esakinan pa evita cu nan lo haya un propio bida.

Expresionnan haci den e articulo aki no necesariamente ta refleha opinion di ArenaPoliti.co