Prome Minister Eman tabata presente pa desea nan exito riba nan mision. 

SAVANETA - Prome cu e bapor 'de Holland' a sali pa Haiti cu shen miembro di Marina Real y dos boluntario di Cruz Cora, Prome Minister Eman hunto cu Comandante Timon van Dishoeck, tabata presente na e pier di Kustwacht pa desea nan exito cu nan mision y duna nan palabra di apoyo pa loke nan ta bay mira y mester traha cu ne na Haiti. Despues cu horcan Matthew a hit Haiti den forma directo y cu forsa bruto, e pais y su hendenan a keda den un situacion devastador, un situacion di tormenta. Marina Real Hulandes situa na Aruba ta bay brinda ayudo eynan y for di Corsou tambe ta sali e bapor 'de Pelikaan' rumbo pa Haiti cu comestibel, awa y loke mester pa brinda cuido medico y cuido humanitario.

Eman a bisa cu su presencia eynan na e pier ta tambe pasobra como Prome Minister e ta encarga cu aspectonan di Defensa y encarga cu Marina Real na Aruba. "Den casonan di ayudo internacional logicamente nos ta hunga un rol evidente. Na e momentonan aki ainda nos ta wardando riba permiso di Den Haag pa por cuminsa cu e mision. Pa no perde tempo, a cuminsa caba cu tur preparacion. E bapor 'de Holland' ta full ekipa pa e mision aki y hunto cu nan ta bay dos miembro di Cruz Cora cu voluntariamente ta bay yuda. Nos ta masha orguyoso di nan. Nan ta Marla Thiel-Dominguez y Andre Petrocchi. Marla a bay Haiti 4 biaha caba durante momentonan sumamente dificil pa Haiti. Dos bes tempo di e teremoto y dos bes riba misionnan internacional. E experiencia di Marla por yuda e otronan den asistencia cu por tin un contribucion importante den un situacion sumamente penoso cu tin na Haiti na e momentonan aki."

Prome Minister Eman cu tin un relacion special cu Haiti ta bisa cu e situacion ta grave. "Haiti ta un pais caba cu hopi reto cu situacionnan dificil, awor ta haya un situacion adicional cu naturalmente ta haci cu nos como mundo tin cu responde pa yuda. Nos semper ta biba hopi di cerca cu e situacion na Haiti. Despues di e temblor nos di Aruba a traha dos scol eynan y semper nos ta keda purba pa duna un contribucion humano na e pais aki." Eman a desea Marla y Andre hopi exito, sabiduria y siguridad riba nan mision mescos tambe esnan di Marina Real. E ta bisa cu e ta imagina su mes cu e ta bay ta un trabou dificil si mira e imagennan riba pantaya di television y otro medionan social."

Expresionnan haci den e articulo aki no necesariamente ta refleha opinion di ArenaPoliti.co