Andin Bikker, lider di Partido Democracia Real, a bisa den rueda di prensa cu ta parce cu e iniciativa di banda di PDR cu pa hopi tempo ta insistiendo riba dje, pa reintroduccion di un Hyper Baric Chamber, pues un camber di presion, ta bay bira realidad.

Diamars tabata tin un presentacion na Dr. Horacio Oduber Hospital di un grupo piloto cu ta bezig pa reintroduci e HBC.

El a splica un bez mas kico e kamber di presion aki ta. Esaki ta pa ora tin hende cu ta practica scuba diving, cual ta wordo practica pa un mayoria di nos turistanan, y e ta bin subi den superficie demasiado lihe y por haya un problema medico, e ora ey pa decomprensa y por haya tratamento, nan ta wordo hinca den e kamber aki anto nan ta haci un decompresion pa nan por cura di e malesa aki.

Andin Bikker a añadi cu los di esey tin varios tratamento terapeutico tambe cu e aparato aki por yuda, por ehemplo, heridanan di naturaleza diabetico cura mas lihe, y asina scapa di amputacion di un pida, un dede of un braza.

Bikker a splica tambe cu esaki ta tres dos beneficio. Di un banda e ta trece beneficio pa nos turismo pasobra si un turista ta haya su mes den problema di decomprension tin e sistema pa yude. Nos tabata tin e sistema aki un par di aña pasa caba y aworaki lo reintroducie, y di otro banda esnan cu tin problema di nan salud cu terapeuticamente e kamber aki por yuda tambe ta beneficioso pa casonan di salubridad.

“Nos por recorda e temponan aya no mucho tempo pasa dr. Ike Posner tabata tin un clinica, segun mi, di e aparatonan aki y lamentablemente pa un mal entendimento cu AZV no a na un entendimento pa por a percura cubri e gastonan. Naturalmente e tempo ey nos a protesta y nos a pidi gobierno pa haci algo, pero lamentablemente mester a cera e clinica. Desde eynan dia 12 di October 2014 pa ta mas exacto nos a haci preguntanan y duna sugerencia na minister encarga cu salubridad, pa por yega na un reapertura di un facilidad asina y nos ta contento di tende cu e esfuerzonan den direccion akinan ta bayendo riba bon caminda y nos ta spera cu awe mainta nos ta haya notificacion cu esey ta bira realidad den un tempo corto” palabranan textual di Andin Bikker, lider di PDR.

Expresionnan haci den e articulo aki no necesariamente ta refleha opinion di ArenaPoliti.co