E digno pueblo di Aruba no ta proefkonijn di niun gobierno. E abusonan politico comete di 2009 pa 2017 ta inaceptabel den tur sentido di palabra. Ta un crimen locual Gabinete Mike Eman a haci cu nos pueblo. Prijsnan na pomp di gasolin ta un crimen, prijsnan na supermercado ta un crimen y prijsnan na Elmar y WEB mas aun. Ken lo paga nos bek e abusonan economico aki? Gobierno di Mike Eman a hedge nos pa tres aña pa casi 100% segun Minister Mike De Meza, anto e contract no por wordo kibra. MEP tawata hedge pa tres luna y monitor esaki di cerca na un manera hopi responsabel compara cu locual AVP a haci. Un Banco pa Nord di nos hemisferio a gana miyones di dollars riba custia di nos digno pueblo. Mescos ta e caso cu Lotto pa Deporte unda mayoria di ganashi ta bay pa un Banco Canades y no den deporte Arubano. Ken di Gabinete Mike Eman lo paga nos bek pa e abusonan cometi? Cuanto placa e politiconan di AVP a haya bao mesa pa core campaña cu ne na 2017? Pesey AVP por core campaña lucrativo y miyonario cu bandanan, petchi, t-shirts hasta bicicleta (bais) berde tawata tin na 2013. Esaki sigur mester wordo investiga. 

Den e deal spirito di CITGO unda a sconde mayoria di e contract di 2000 pagina tambe lo bira un otro dolor economico pa nos pueblo. PDVSA keto bay ta bezig cu proyectonan di exportacion di gas via pipeline pa Colombia y Brasil lo sigui. Prijsnan di gasolin na baca flaco pa dicho paisnan. Kico Minister Mike De Meza y su coordinador awo Minister Richard Arends a negocia? Nada no a wordo negocia pa nos pueblo haya gasolin super barata manera Colombia, pero ta organisa fiesta y mas fiesta pa tapa e abusonan aki. Na Aruba nos kier rebaho SUBSTANCIAL riba energia mirando e abusonan politico cometi desde 2009 contra nos digno pueblo. Nos mester cambio awo y pueblo lo uni pa trece e cambio. E unico alternativa ta Movimiento Electoral di Pueblo pa nos para e abusonan contra nos. Esaki ta e momento pa rescata nos pais di perdicion na man di partido AVP y nan sponsornan miyonario cu ta kita e dignidad y honor di nos pueblo. Mas vale morir de pie, que vivir de rodillas.

Expresionnan haci den e articulo aki no necesariamente ta refleha opinion di ArenaPoliti.co