E ta un realidad cu nos pais ta hopi leu di tin un finansa sostenibel. Hopi biaha Gabinete Eman ta papia di sostenibilidad pero no ta duna contenido den esaki ora ta trata di nos situacion financiero. Promer cu Gabinete Eman a tuma mando di pais Aruba na 2009 nos debe nacional tawata alrededor di 41% y awor esaki den apenas 5 aña a resulta di ta 80.7%! Den pasado instancianan internacional manera Fondo Monetario Internacional (IMF) a indica cu 40%  ta e nivel maximo di debe (norma) pa un pais cu economia chikito manera esun di Aruba. Den e rapport di CFT relaciona cu presupuesto 2015 cu recientemente a wordo publica, e organo di supervision tambe ta pone hopi enfasis pa por yega na e dicho nivel. Pesey e desaroyo di e deficitnan presupuestario di aña 2015 te cu 2018 y pa e añanan despues di 2018 ta determinante p’asina nos por logra baha nos debe nacional na nivelnan internacionalmente aceptabel.

Proyecionnan irealistico
Un di e promer milestone cu ta riba e to-do list di gobierno ta cu e mester demostra (y haci e ehercicionan necesario) cu nos pais lo logra un presupuesto balansa na 2018. Den cuadro di esaki e presupuesto 2014 mester a inclui tambe e calculacionnan multi-anual 2015-2018 p’asina CFT por a haya un bista di nivel di realidad y desaroyo di nos finansa publico. Gabinete Eman - a base di su plan "balanced budget accoord"- a presenta un total di 24 medida parti den dos categoria: 1) medidanan pa genera entrada y 2) medidanan pa corta gasto. CFT a indica den su rapport 2015 cu mescos cu aña 2014 e medidanan presenta den e presupuesto 2015 di pais Aruba te ainda ta incompleto, ta duda cu e proyeccionnan di e siguiente añanan (2016, 2017 y 2018) ta realistico y cu nan lo ta factibel (por wordo logra) pa realisa un presupuesto balansa.

Medidanan riguroso
Considerando e hecho aki, e instituto CFT a recomenda 4 proposicion concreto cu ta den linea cu e intencion di gobierno y cu lo fungi como sosten na e meta pa realisa un presupuesto balansa. E 4 recomendacionnan aki tawata entre otro: 1) frena e crecemento structural di gastonan di gobierno, 2) mas pronto cu ta posibel implementa medidanan adicional, 3) presenta un plan concreto con e medidanan di balanced budget accoord (incluyendo medidanan adicional) lo wordo ehecuta y finalmente, 4) trece ordo den e administracion financiero y haci cambio den e Ley di Comptabilidad. Loke bo por saca afor di esakinan ta cu e medidanan pa e añanan 2015-2018 (cu nan mes a propone) lo bay ta mas riguroso y di proporcionnan grandi . Hecho ta cu sin ehecuta esakinan gobierno lo no logra un presupuesto balansa y tampoco haya un aprobacion di parti CFT pa despues por bay fia placa riba mercado internacional.

Reduccion debenan
Ta hopi importante pa enfatisa riba e hecho cu solamente si Aruba logra un surplus di 0.5% den e presupuesto desde 2018 (esaki kiermen cu tur e medidanan mester a wordo implementa caba) y structuralmente mantene esaki, nos pais lo por logra reduci nos debe nacional di 80.7%. Den un scenario asina lo nifica cu Aruba te na aña 2034 lo por logra na obtene un situacion financiero sostenibel cu un debe nacional di 40%. CFT a subraya cu asina so Aruba lo por logra recupera e confiansa bek di Hulanda.
Como hoben politico mi ta lamenta cu Gabinete Eman a crea den un periodo asina cortico (solamente 5 aña!) un dilema financiero cual awendia pueblo lo ta e victima di medidanan. E solo hecho cu lo dura nos pais aproximadamente 20 aña  pa por logra un nivel di debe sostenibel ta uno di condena. Ta obvio cu Gabinete Eman a crea un desaster financiero y nunca tawata digno di e confiansa di pueblo!

Expresionnan haci den e articulo aki no necesariamente ta refleha opinion di ArenaPoliti.co