Den e dianan aki cu hopi ta ser bisa di e rapport di CFT ta bon pa recorda Pueblo di Aruba cu no ta CFT ta esun cu ta bin cu medida, sino ta Gabinete Eman mes ta esun cu a propone pa bin cu 24 medida pa asina por drecha e desastre financiero cu nan mes a ocaciona den e ultimo 5 aña di nan gobernacion. Remarcabel ta cu despues cu tur tempo Minister Eman tabata masha bon amigo y cu a haci su best semper pa ta “de beste jongen van de klas den Reino,” awe ta core pa no duna cara na Pueblo y tampoco na Hulanda pa promesanan cu e mes a haci.

Ta bon pa recorda cu for di februari 2014 caba ex Minister Yrausquin den nomber di Gabinete Eman y cu consentimento di Minister Eman a bay di acuerdo den e carta di “geen bezwaar” cu e condicionnan cu e Conseho di Ministernan di Reino a exigi di Aruba pa asina por haya autorisacion pa presta placa riba mercado mundial. E tres condicionnan aki tabata, 1. pa presupuesto 2014 incluso e medidanan cu Gabinete Eman ta propone keda aproba promer cu 1 di mei 2014, 2. pa presenta un plan con lo aplica e medidanan cu IMF a recomenda Aruba den e presupuestonan 2015 te cu 2017 pa por yega na un balanced budget y 3. pa laga e presupuesto y e plan wordo evalua pa un tercer instancia independiente. Pa locual ta trata e ultimo aki ta bisto cu ta CFT e instancia aki ta. Pesey awe Minister Eman y esnan liga na AVP no por bisa cu ta Hulanda of CFT ta esun cu a bin impone medida riba Pueblo, ya cu ta Gabinete Eman mes a propone pa bin cu e 24 medidanan aki.

Ta bisto cu Minister Eman no kier duna Pueblo y tampoco Hulanda cara pa tur locual a keda palabra den e carta di “geen bezwaar” cu Hulanda. Awor cu e momento a yega cu Minister Eman mester tuma e medidanan cu e mes y su ministernan a priminti na Hulanda, nos ta mira cu Minister Eman ta core bay sconde na Merca pa no mester topa cu secretario di estado Hulandes encarga cu asunto di Reino sr Van Zwol kende ta na Aruba awor pa haya sa con ta para cu e medidanan cu mester wordo tuma. Mas tristo ta cu Minister Eman no kier duna Pueblo di Aruba cara y splica kiko e 24 medidanan aki ta ensera y con nan lo afecta e cartera di cada cuidadano di nos Pais.

26 januari 2014

Expresionnan haci den e articulo aki no necesariamente ta refleha opinion di ArenaPoliti.co