Manera ta conoci tin un tendencia cu e prijs di crudo riba mercado internacional a baha drasticamente. Remarcabel ta cu e caida aki si no a resulta den tarifanan mas abou di coriente pa nos pueblo. Hustamente aña pasa oktober Elmar cu sosten di fraccion di AVP a hasta aumenta tarifa di coriente cu 15%.

Nos tin entendi cu WEB a cera un hedging contract cu un compania di seguro pa compra di heavy fuel oil. Relaciona cu esaki nos kier haya informacion for di cual compania WEB ta cumpra esaki y for di ki tempo e compania aki a bin padilanti. Informacion cu nos a ricibi ta cu e consentimento di e Hunta di comisario apunta pa Gabinete Eman a procede cu e decision aki lagando WEB cera dicho contract. Ademas di esaki e hedging no ta mara na tempo, sino na  volumen (cantidad cumpra). E volumen aki lo tin un duracion di mas o menos 2 aña, esta te na final di 2016 e contract lo ta vigente.

Segun pronosticonan mundialmente a señala cu e bari di petroleo lo keda por lo menos pa un aña rond di e prijs di 53 dollar pa bari. Hasta un di e giganteman di petroleo British Petroleum (BP) ta pronostica cu esaki lo keda pa 3 aña banda di 50 dollar. E contract di hedging cu WEB a cera ta mara na e prijs di alrededor 83 dollar pa bari. Esaki ta pone cu den 2 aña di tempo Aruba lo ta pagando e compania mas di 400 miyon florin na heavy fuel oil, cual mas o menos mitar di dje ta bay na ganashi di e compania aki. Bo ta imagina cu den solamente e periodo aki e compania ta gana 200 miyon florin a costo di un pueblo? Esaki ta sin conta handling fees, pasobra si e lo ta acerca e lo nifica un 30 miyon florin adicional.
E realidad ta cu e posibilidad tawata tey pa por a baha e tarifanan di utilidad, pero toch a opta pa tuma e decision robes.

Expresionnan haci den e articulo aki no necesariamente ta refleha opinion di ArenaPoliti.co