“Den pasado mi tabatin e responsabilidad den comunidad cu nos Sector Primario caminda cu na un forma hopi agradabel a conversa recientemente cu diferente piscadornan na Aruba. Tin entusiasmo grandi bou di e maneho cu a wordo hiba pa Sector Primario entre otro nos piscadornan. Nos por a drecha un gran cantidad di piernan cu den pasado nunca a haya atencion y a brinda oportunidad igual na tur piscador. Algun siman pasa mi taba na e proyecto di Noord Cura Cabay/Zeewijk unda cu por a admira e bunitesa di naturalesa y e espacio cu ta wordo crea eynan. Un bario cu nunca a haya atencion awo tin un beach completamente renoba, pa cual e proyecto aki poco poco ta yegando na su fin. Tambe e aspecto di e piscadornan na Noord Cura Cabay y Zeewijk a haya un facilidad danki na e vision di tin un maneho pa tur loke ta trata piscadonan na Aruba.”

Den e proceso a cambia un ley (cual ta mira cu no ta wordo empuha manera mester ta pa e piscadonan y Sector Primario compronde cu nan tin cierto derechonan) cu ora cu ta trata na material pa trabou unabes ta inscribi na Camara di Comercio y na Santa Rosa, bo ta haya esakinan liber di impuesto na entrada. Ora cu a constata cu hendenan tabatin miedo cu si nan inscribi na Camara di Comercio nan ta bin cobra nan belasting despues, a saca un maneho aña pasa cu Sector Primario completo tin derecho riba tax holiday. Pues no ta paga ni inkomstenbelasting ni winstbelasting. Esaki ta algo cu POR lo sigui fomenta y lo haya un atencion hopi special den nos programa, Otmar Oduber a duna di conoce.

2 problema grandi actualmente 
Na e momentonan aki nos piscadornan ta wordo perhudica na un forma hopi grandi door di e mercado di piscadornan Venezolano cu na e momentonan aki ta bin Aruba pa bende pisca. Mester bin cu un control mas severo riba e piscanan cu ta drenta pa garantisa salubridad di comunidad y mester pone control mas fuerte pa calidad y freezer pa tin bon temperatura.  

Practica preocupante andando 
A mira con e practica ta tuma luga a base di potretnan cu a mira di piscanan benta riba pier na Barcadera cu ya a 'defrost' door di e biahe di Venezuela pa Aruba. Actualmente 1Dollar ta riba 4000 Bolivar kiemen na e momentonan aki ta bende un pisca 2 of 3 Dollar na Aruba, cu ta hopi mas abou cu un piscador local por bende su pisca pa kilo. E personanan aki ta bay bek y cambia e 3 Dollar ey y ta manera ta 100 pisca nan a bende. Pesey si nan resta pisca, nan ta tira esakinan den lama bek morto y no ta interesanan.

Mester percura pa tin control na momento cu piscadornan kier drenta cu e piscanan aki unda cu por para nan si nan no ta cumpli cu cierto calidad. Pa salubridad tin un trabou pa controla tur barco di pesca di Venezuela cu ta drenta pa loke ta e standardnan. Esey ta e unico manera cu lo por purba cuminsa frena un situacion cu ta hopi dificil na e momentonan aki pa nos piscadornan. Hopi a wordo haci den pasado pero lamentablemente ta mira cu pa e fenomeno aki no tin un direccion/maneho ainda pa proteha nos piscadornan. Ta haci suplica na gobierno pa actua rapidamente. Mi no ta kere mester ley pa wordo cambia y cu ta algo cu por wordo haci inmediantamente pasobra ta control mester bin pa proteha e indutstria aki, sr. Oduber a splica.

Centro pa piscadonan 
E di dos preocupacion cu ta trece dilanti ta cu mester crea un centro caminda cu tur piscador di Aruba cu bin cu nan piscanan y no logra bende tur e dia ey, lo por warda esakinan den freezer pa e siguiente dia. Hopi di nos piscadorcanan tin e problema aki, consecuentemente ta regala piscanan cu no wordo bendi y den casonan mas extremo mester benta esakinan afo.

“Mi persona a mustra e compromiso cu mi tin cu e sector aki, lamentablemente ta mira cu e ultimo 6 lunanan practicamente nada a tuma luga. Pa loke ta Santa Rosa, porfin mercado di Santa Rosa a cuminsa bek pa cual mi kier elogia e empleadonan di Santa Rosa pa haci esaki pasobra nos comunidad tabata den necesidad di e continuacion di e mercado aki. Pero nos mester percura cu despues di 22 di september of kisas desde awo caba cu a trece e puntonan aki dilanti, cu gobierno lo por cuminsa mira den e direccion aki.”

Expresionnan haci den e articulo aki no necesariamente ta refleha opinion di ArenaPoliti.co