Y e cambio pa miho y pa tur cu a sigui!  

Na 2010 Banco Central a describi e caida economico di Aruba como esun mas pio den 25 aña. IMF a describi e caida economico dramatico di Aruba cu e "dobbel dip": e seramento di e refineria y e efecto di e crisis mundial. Mientras den paisnan rond di nos y den henter mundo economia a cay cu 2 te 3 porciento, na Aruba ela cai cu 11% den un aña y cu 15% entre 2007 y 2009. Den e grafico di Banco Central akibou por wak con grandi e caida den economia na Aruba tabata y su efectonan riba tur otro tereno. E decadencia causa door di negligencia y otro prioridadnan bou gobierno di MEP, a haci e situacion social na Aruba ainda pio. Desempleo a subi atrobe bou di gobierno di MEP te ariba 11%. Inversionnan cu mester stimula economia y mantene nos pais, a stop. Scolnan, edificionan publico, ciudad y barionan, facilidadnan recreativo y cayanan, cu ta responsabilidad di gobierno, tabata den decadencia. Debenan atrasa di gobierno a acumula y a bira casi impagabel. Fondonan di pensioen cu ta responsabel pa entrada di mas cu 20 mil pensionado y nan famia, tabata core peliger grandi di no por cumpli cu e pensioen mensual. Pobresa y desesperacion tabata reina tur caminda. Cu e refineria y negoshinan sera y turismo den caida, no tabata tin niun speransa bou di gobierno di MEP pa un miho futuro pa Aruba. Esaki ta e situacion real cu Aruba tabata aden na 2009-2010. Tur hende cu a biba na Aruba por conta e experiencia amargo aki. Pero cos a cambia. Awe Aruba ta un pais den pleno renobacion y creciendo atrobe!

KICO A PASA  
Desde 2010 gobierno di AVP a inicia un periodo largo di renobacion di nos pais y inversionnan pa realisa y sostene e renobacion aki. E inversionnan tabata den infrastructura di Aruba cu tabata antigua y den forsa di compra di e grupo grandi di nos pais cu e entrada mas abou. Tambe a inverti miyonnan pa salba e fondonan di pensioen pa e penisonadonan di awe y esnan di futuro. E maneho di reforma den tur sector di nos pais a percura pa nos economia sali di e punto mas abou di -11% cu e tabata na 2009, te uno di crecemento cu + 2% awe. Un crecemento di mas cu 13% den 7 aña! Desempleo cu tabata na 11% a baha te bou di 6% awe. Mientras cu MEP atrobe ta purba crea e impresion cu finansa publico y nos pais tabata bon bou gobierno di MEP, e realidad ta cu nos pais tabata den decadencia y Pueblo tabata sufri den tur forma y sin speransa pa cos drecha pa nan. Gobierno di AVP a cambia e maneho totalmente y a usa concientemente recursonan di gobierno pa saca nos pais di e situacion di decadencia y sin perpectiva. Awe Aruba ta den pleno renobacion y ta crece atrobe pa nos tur. Awor cu e economia ta mas fuerte y tin mas hende bek na trabou, nan ta aporta mas na caha di gobierno. Asina por sigui pone finansa publico den balansa. Mientras MEP no por splica dicon pueblo y pais mester a sufri si cos tabata asina bon na 2008 y despues, AVP a scohe pa pone Aruba bek riba pia y pueblo bek na trabou. Pesey awe Aruba ta wak su futuro cu optimismo. Pueblo ta wak cu Pais y Pueblo mes ta haya e atencion mereci! 

Expresionnan haci den e articulo aki no necesariamente ta refleha opinion di ArenaPoliti.co