Tin estudionan reciente cu a wordo haci na Aruba y nan conclusion ta cu mas di 50% di e poblacion laboral ta traha mas cu 40 ora pa siman. A pesar cu e ta reconosi como un conkista universal di e trahador di no traha mas cu 40 ora pa siman, toch na Aruba mas cu mitad, ke men e mayoria di e clase trahador, ta traha mas cu 40 ora pa siman. Esaki tin di haber cu e salario minimo pa e 40 ora di trabao no ta suficiente, pesei e trahador tin cu hasi un di dos trabao of un sidejob pa meet the ends na fin di luna. Pero esaki tin consecuencia negativo pa nos muchanan. 

Hopi mucha ta lanta e ora ey sin e atencion debido, ora cu scol caba nan ta yega cas y no tin guia pa motibo di e ausencia di e mayornan cu tin cu traha mas cu 40 ora pa siman pa pone pan riba mesa. No ta mala fe di e mayornan, sino cu simplemente nan mester traha mas cu 40 ora pa siman pa por cria nan yuinan. Y un mucha sin guia y atencion facilmente por bira victima di gangnan hubenil, cu si ta dune atencion y un sentido di pertenencia y identidad. Asina criminalidad hubenil ta aumenta den un pais. 

Rapport di UNESCO ta confirma e realidad aki, cu e problema na Aruba ta e “verwaarloosde kinderen”, loke ta un situacion di violacion di derechonan di mucha. Ora UNESCO senjala algo asina, un gobierno di un pais mester asumi su responsabilidad. Pesei partido ReD den su programa di gobernacion ya for di 2005 a propone lo siguiente y e ta bolbe ta presente den nos programa di 2017:

“Programa escolar extra-curicular: Na scolnan primario, secundario y profesional basico y intermedio, mucha y hoben ta participa den e proceso di enseñansa. Hopi mucha y hoben no tin cos di haci despues di scol fuera di huiswerk. ReD ta boga pa un sistema den cual tur mucha y hoben ta envolvi cu  y den comunidad den ramo di deporte, social, cultural, comunitario como participante, miembro di directiva o guia. Esaki lo bira un aspecto extra-cricular pa nos muchanan y hobennan y asina haya nan mas envolvi positivamente den comunidad. Lo ehecuta esaki pa medio di e proyecto Club Escolar”.

Ora cu scol caba merdia, atardi na tur scol di un forma gratuito ta ofrese na tur mucha y hobennan lesnan di muziek, deporte, arte sea teatro of pintura, guia di huiswerk dor di un otro team cu por keda recluta bao di nos funcionarionan publico cu  tin cierto talento riba algun di e terernonan aki. Di e forma aki ta preveni cu nos muchanan y hobennan ta cai den gara di gangnan.

Rudy Lampe, candidato riba lista di ReD

Expresionnan haci den e articulo aki no necesariamente ta refleha opinion di ArenaPoliti.co