Evelyn Wever-Croes y Guillfred Besaril a reuni cu reclassering. 

ORANJESTAD – Stichting reclassering e anja aki ta cumpli 55 anja di existencia, y e siman aki a declara e siman di reclassering. Pa e motibo aki parlamentarionan di MEP Evelyn Wever-Croes y Guillfred Besaril a reuni cu directora sra. Pemberton y sra. Frasier. 
Stichting Reclassering en Jeugdbescherming ta hunga un papel hopi importante den combati criminalidad bou di nos hobennan. Hobennan cu a cai den man di husticia ta haya guia di e fundacion, pa evita cu nan ta bolbe cai. Hobennan problematico cu no a cai den man di husticia, tambe ta wordo guia pa evita cu nan lo cai den man di husticia.
Duna castigo ta un parti importante den caso di crimen, pero percura pa rehabilita esun cu a comete crimen y percura pa e no ripiti e crimen, ta un parti hopi importante tambe, y lamentablemente hobennan ta ripiti crimennan hopi biaha. 

Stichting Reclassering en Jeugdbescherming ta un fundacion los di gobierno, y ta encarga cu rehabilita ex presonan pa nan integra bek den comunidad, y yuda hobennan problematico pa evita cu nan cai den man di husticia.
Castigo no ta tur cos, ta con e ex preso por sigi cu su bida despues di sali di prison, ta determina si e lo bolbe comete e crimen of no. Pesey ta importante pa sostene e fundacion aki. 
Stichting Reclassering ta encarga tambe cu ehecuta sentencianan impone door di huesnan, por ehempel pa e persona sinja domina su rabia, of stuur auto bou influencia. E pryectonan aki ta wordo financia door di e fundacion mes. 

“Nos ta tene contacto regular cu Stichting Reclassering pa nos keda informa di e desaroyonan riba e tereno aki, y duna nan e sosten cu nan tin mester pa continua cu e trabou. Durante nos reunion nos a haya hopi informacion cu ta importante pa nos por trata e presupuesto di husticia pa 2017, cu dentro di poco lo wordo trata den Parlamento. Mirando cu e stichting ta haya subsidio pa un parti so di gobierno, nos ta urgi tur persona y compania cu realmente kier duna un contribucion na combati criminalidad bou di nos hobennan, pa yuda Stichting Reclassering cu nan actividad di recauda fondo. Nan ta celebra 55 anja, y ta sugeri donacion di 55 florin, y companianan double up 100 florin. Ban hasi Aruba un mihor lugar pa nos tur, especialmente pa nos hobennan, contribui cu Stichting Reclassering”, lider di MEP Evelyn Wever-Croes a duna di conose.

Expresionnan haci den e articulo aki no necesariamente ta refleha opinion di ArenaPoliti.co