Jacky van Putten (POR): Criminalidad ta for di man y nos hobennan ta esnan mas afecta
Den e plan di gobernacion di e Plataforma Forsa Nobo, POR nos a premira e situacion di criminalidad cu nos isla ta pasando aden y a pone halto den nos programa:
Implementacion di un programa di prevencion social di criminalidad; intervencion di parti di autoridadnan competente y otro stakeholders mester ta unda formacion di e mucha y e hoben ta tuma lugar, esta na cas, den bario y na scol, cu enfoke riba norma y balornan positivo cu ta contribui na formacion di un ciudadano.
Crea un Centro di Detencion pa hoben (jeugddetentie Centrum), unda hobennan cu comete actonan castigabel por haya guia specialisa y profesional, mara na un trayecto di rehabilitacion y resocialisacion. Reclasering den e cuadro menciona lo wordo reforsa unda cu ta necesario y duna un rol central.
Mi persona a traha na KIA (Korrectie Instuut Aruba) na 1990- 1995 unda mi por a wak y traha cu hopi hoben cu a cay cera y sin ayudo a haya nan mes cada bes ta regresa. Awe mi ta topa algun ainda, nan forma di biba no a cambia y ainda nan ta regresa KIA. Corectamente mi por a tende e precupacion di sra. Seraida Pemberton directora di Stichting Reclassering en Jeugdbescherming . El a splica cu e problematica aki a sigui crece y ta un problema grandi. Awe 2017, casi 27 aña despues, dos partido nan so den gobierno ultimo 16 aña y nada a wordo haci, al contrario, e crimennan cu nos hobennan ta comete ta mas grave.
Minister di Husticia Arthur Dowers ta culpa e mayornan cu no ta guia nan yiunan debidamente. Esaki por ta un parti di e problema, pero unda gobierno a keda, unda a aporta pa cu e solucion. Sra Pembeton ta expresa cu no tin placa ni personal pa ataca e problematica. Cu otro palabra nos gobierno no tin nos hobennan como prioridad.
Den debate di KVK Prome Minister a declara cu mas cu 60% di nos poblacion ta biba bou di e nivel minimo di bida. Anto mi ta puntra con e mayornan aki cu tin cu traha te hasta dos trabou por ta atento, guia nan yiunan y provee e necesidadnan basico. Gobierno mester duna un man cu esaki. Pesey POR ta kere den hiba deporte den barionan y na scol y trai merdia pa asina kita nos hobennan for di caya.
Otro instancia, YMCA, a bati alarma. Nan no por cu e tantisimo peticion pa programanan di traimerdia, pasobra no tin suficiente placa ni personal.
Deporte/arte y musica ta unda e muchanan aki lo ta bou guia di profesionalnan cu lo por yuda evita cu e muchanan aki ta riba caya.
Aki ta unda IBiSA departamento di gobierno encarga cu deporte y movecion mester encarga pa implementa programanan den bario un biaha mas, traha conhuntamente cu ASU. Departamento di Cultura tambe mester wordo involucra pa trece programanan di arte, baile y musica den bario y na traimerdianan.
Deporte, musica y arte den bario ta den nos Plan di Accion di partido POR y lo haya su debido atencion.
Por siqui mi via mi Facebookpage @jacquelineponsonvanputten/ website jackypor.com
Expresionnan haci den e articulo aki no necesariamente ta refleha opinion di ArenaPoliti.co