“Para na banda ta facil, pero pone man na obra ta un reto cu mi ta cla pa tuma”      

ORANJESTAD - Sanger hoben y dinamico ta reenforsa lista di Partido di Pueblo Arubano (AVP) den persona di Maurits Malmberg. E candidato a haci su lansamento oficial diabierna anochi den seno di Cas di Partido na Playa compaña pa famia, amigo y sostenedonan di e partido berde. Lider Mike Eman a yama Maurits bon bini riba e lista triunfante, ya cu Malmberg ta un miembro di e famia AVP ya for di casi 10 aña.

Lider Mike Eman: “Nos ta cumpliendo cu un mision importante cu nos partido tin pa cu pais Aruba; nos mester forma un lista di candidato pa goberna un pais. E partido aki ta e cuna di e lider di awe, pero mas importante ta e cuna di e lidernan di mañan. Maurits Malmberg ta yuda garantisa cu AVP lo sigui traha cu e mesun dedicacion y mesun amor pa nos pueblo. Mi ta yama cu un curason trankil pa e entrega su talento y sirbi e pais aki, danki Maurits!”

Previo na e anuncio oficial, a yuda den su introduccion Esther Gomes como bon amiga, Edwin Abath como colega y Gerry Franca kende ta su omo. Cada un na su turno, a yuda un y tur presente conoce otro faceta di e politico hoben; esta como amigo, como profesional y como famia. Para hunto cu e candidato hoben, tambe tabata su casa Louella y nan yiu homber Ethan, ademas di su mayornan y ruman. 

Malmberg ta bin di famia di Rancho y su tata ta di pariba na Weg Seroe Preto. Despues di a studia na Amsterdam, Maurits tabata hopi activo den union di e comunidad Arubiano na Hulanda. Esaki hunto cu su educacion y dedicacion a hala atencion di Prome Minister Mike Eman kende a reclute como parti di e ekipo cu a sostene sr. Mito Croes (dfm) den su trabou na Union Europeo.

Cu bista riba e trabou cu e por desempeña den e tereno di economia, cu enfasis riba empresario y profesionalnan hoben, Maurits un di su pensamentonan ta cu “para na banda ta facil, pero pone man na obra ta un reto cu mi ta cla pa tuma.” Su atencion lo ta riba famianan jong cu ta cuminsa forma nan bida profesional. “Nos di partido AVP ta dialogando con nos por apoya y motiva pa crea mas oportunidad den futuro pa bo. Tambe mi ta desea di focus riba un economia nobo y duradero en especial crea oportunidadnan pa freelancers y personanan cu ta opera negoshinan autonomo.”

Expresionnan haci den e articulo aki no necesariamente ta refleha opinion di ArenaPoliti.co