“Hunto nos POR cambia esaki!” 

Den un articulo anterior mi a papia di e hecho cu na Aruba nos ta lantando un sociedad kibrá, un ‘broken society’. Bullying ta un di e causanan di un sociedad kibrá: Bullying door di adulto, cual ehempel ta wordo sigui door di nos muchanan. 

BULLYING DOOR DI ADULTO NA ARUBA 
Tur dia cu bo habri FaceBook, lesa corant, wak television of atende un reunion publico di gobierno bo por wak con adultonan ta bully otro. Nan ta perde tur clase di respet pa nan mes, pa otronan y pa autoridad. Nan ta usa palabranan malo y ofensivo contra otro, nan ta juzga otro cu of sin pruebanan concreto, nan ta daña nomber di hende, nan ta caba cu trabaonan, logronan of bon intencionnan di otro. Niun hende no ta tuma tempo pa scucha otro, no ta responde na otro den un forma respetuoso ora cu tin un desacuerdo, no ta sinta hunto y purba soluciona problemanan y ta cla pa huzga y sentencia otro. 

Un ehempel cu mi mes a experencia recientemente ta ora mi a publica un articulo tocante e lucha cu hopi di nos, incluso mi mes, tin cu sobre peso. Personanan cu mi no conoce a cherchemi online cu mi mes ta gordo, cu mi mester wak den spiel y asina mas cos. Esaki ta bullying, pasobra nan no ta discuti riba nivel y cu respet riba e contenido di e articulo, sino ta ataka mi personalmente, Sr. Bameyer ta bisa.

BULLYING TA CONDUCI NA UN SOCIEDAD KIBRA 
E manera con nos como adulto ta comunica cu otro tin efectonan grandi riba nos sociedad, tanto riba e victima di bullying, como riba e bully mes. Moral, respet, normanan y valornan ta wordo laga un banda y nos sociedad ta bira un ‘free for all’, caminda niun cuidadano no tin derecho di wordo respeta como ser humano of como autoridad.

E bully ta haña un sentido di poder cu no ta na su lugar, especialmente si otro bullies ta sostene den loke e ta hasi y su conducta lo bai aun mas atras. E bully hopi biaha tampoco no ta conciente cu su actonan por tin consequencia negativo pa e mes, por ehempel pa e haña un trabao. Niun dunado di trabao kier tuma un persona den su compania cu no sa comunica cu respet cu otro. 

E victima di un bully di otro banda ta wordo gehurt y esaki por conduci cu e mes ta bira un bully, pa defende su mes y hurt back e persona cu a hurt e. Esaki ta conduci na escalacion di e problematica. 
Otro victimanan no sa con pa procesa loke nan ta pasa aden y esaki por conduci na rabia, depresion, reducion di productividad na trabao, desconecion cu famia, mal uzo di droga y alcohol y hasta suicidio.

Segun sr. Bakmeyer otro consequencia serio di bullying ta e mal ehempel cu nos ta duna nos muchanan di con nan mester trata otro y resolve diferencianan di opinion y problemanan. Muchanan cu ta bully hopi biaha ta sigui e ehempel di adultonan den nan bida cu a bully of abusa di nan of di otro hende. Esaki ta conduci na un sociedad kibrá cu tur su consequencianan negativo pa nos tur.

E SOLUCION 
Terminando, Sr. Bakmeyer ta enfatisa: Manera mi a bisa den un articulo anterior, nos mester re-introduci normanan di balor y respet den nos sociedad. Esaki nos ta hasi door di ta un bon ehempel pa otro, cuminsando for di e top mas halto, cu ta nos gobernantenan, bajendo pa nos adultonan, te jega na nos muchanan. Nos mester siña debati, expresa nos descontento of desacuerdo y ‘agree to disagree’, sin cu mester cai den insultonan personal y falta di respet. Freedom of speech ta un derecho sagrado, pero e no ta duna derecho na niun persona pa kita e humanidad di un otro persona.

Ami, Eromil Bakmeyer, y E Forsa Nobo, ta kere cu nos mester y nos por drecha e fundeshi di nos sociedad y cu haciendo esaki nos lo wak masha hopi frutonan mes den futuro. Respet ta fomenta dialogo, ta trece cooperacion y comprension y union ta trece forsa pa drecha tur loke mester na Aruba. Esaki nos ta wak caba dentro den nos propio plataforma, con nos ta respeta otro, papia cu otro, coopera cu otro y con nos ta dialoga cu esnan cu tin otro opinion cu nos. Nos ta get so much done door di traha hunto y juda otro. Si nos haña boso confianza nos lo sigui cu esaki tambe den gobierno y nos lo zorg pa un cambio den e manera cu gobierno y oposicion ta traha cu otro. Nos ta kere firmemente cu esaki por bai na un manera hopi mas positivo y constructivo y cual lo beneficia cada un di nos na Aruba. Vota Eromil! Vota POR! Hunto nos por hasi nos pais un lugar caminda respet mutuo y traha hunto pa nos Aruba ta bin na prome lugar!

Expresionnan haci den e articulo aki no necesariamente ta refleha opinion di ArenaPoliti.co