Nos a tuma nota di e declaracion den prensa di Minister De Meza riba e investigacion (feitenonderzoek) cu a tuma lugar na WEB relaciona cu e contract di hedging. Prijs di crudo a baha, pero na Aruba e prijs di awa y coriente no por baha debi cu WEB a sera contract di hedging den cual a yega na acuerdo pa paga un prijs pa heavy fuel oil cu awor a resulta di ta hopi mas halto cu e prijs riba mercado mundial. Segun Minister de Meza e contract di hedging aki no por wordo kibra, significando cu Pueblo no lo bay haya un alivio den prijs di awa y coriente. E asunto aki ta un crimen cu a wordo cometi contra e Pueblo di Aruba.

Nos tin entendi cu un contract di hedging ta wordo sera pa cumpra un parti di e heavy fuel oil cu WEB ta usa pa un periodo di algun luna na un prijs stipula den e contact. Pero awor Minister De Meza mes ta informa cu WEB a sera un contract pa cumpra casi 100% di e heavy fuel oil cu nan mester y pa un periodo di 3 aña! Aki nos mester remarca con por ta posibel cu na WEB, na Utilities y e propio Minister De Meza mes no sa cu prijs di crudo lo baha? Ya for di mei 2013 den e revista Forbes analistanan a premira cu e prijs di crudo lo bay baha y por yega te 20 dollar pa bari. Con por ta posibel cu nan no tabata sa esaki?

Nos ta wardando Minister De Meza entrega e rapport aki na Parlamento pa asina Pueblo por haya sa pakiko WEB a sera un contract asina cu ta mustra fuera di lo normal. Un cos ta sigur, esnan responsabel na WEB, Utilities y den Gabinete Eman mester asumi nan responsabilidad pa e crimen cometi contra e Pueblo di Aruba cu e contract di hedging.


24 februari 2014

Expresionnan haci den e articulo aki no necesariamente ta refleha opinion di ArenaPoliti.co