A desvia di strategia di hedging

Den e feitenonderzoek cu a keda haci riba e hedging na WEB nos por lesa cu na 2012 WEB a aserca e compania Kase & Company pa traha un strategia pa mitiga e risiconan di hedging pa WEB. E strategia aki a keda aproba na December 2012 despues cu e Board di Supervicion di WEB a haci cambionan na dje. Asina mes cu e strategia pa mitiga risico aki a keda formalisa y documenta, WEB a sera contractnan di hedging sin cu a tene su mes na e strategia aki. E  Board di Supervicion di WEB a bay contra e strategia di hedging no a keda documenta. riba dje nan a tuma risico grandi cu awe ta perhudica Pueblo malamente.


Ta desvia di strategia di mitiga risico
Riba pagina 14 y 15 di e feitenonderzoek nos por lesa cu "While there is a formalized strategy documented, this strategy was not completely implemented as described in the Risk Management Strategy document. The Supervisory Board limited the different types of hedging, chose not to implement the three zone strategy section, requested a limit per hedge and a wanted close by approving each hedge." "These adjustment made by the Supervisory Board requires an approval at each hedging moment. This has not been formalized and documented..." "As we understood from Hedge team, Management and Supervisory Board executed strategy was not equal to the draft version of the strategy, however Hedge Team, Management and Supervisory Board of WEB acted according to the adjustments of the Supervisory Board."

Board di Supervicion ta esun cu e palabra final
Pues aki nos ta mira cu e Board di Supervicion ta esun cu ta tuma e decicion final pa hedge. Pero den nan decicion nan ta desvia di locual e strategia pa mitiga risico ta prescribi. E cambionan aki no ta wordo documenta, locual ta algo masha cuestionabel. Di banda di e Management y e Hedge Team di WEB, nan ta conciente cu e decicion di e Board di Supervicion ta bay contra di e strategia, pero nan a djies actua conforma locual e Board a dicidi. Ta e Board di Supervicion ta esun cu tin e palabra final.

E Board ta responsabel pa e crimen haci contra Pueblo
Cu of sin documentacion di decicion, for di e informacion presenta den e feitenonderzoek ta bira bisto cu e Board di Supervicion ta esun cu a tuma e decicionnan cu ta concerni hedging. Cu esaki e Board a sinta riba e stul di e Management di WEB y ta bira esnan cu ta promer yama pa para responsabel pa e danio grandi cu a wordo haci na e Pueblo di Aruba. Specialmente pasobra cu tabata nan decicion pa desvia di e strategia y pa core risiconan grandi. Locual cu e Board aki a haci, na nos opinion ta un crimen contra e cartera di e Pueblo di Aruba y nan mester mester carga cu e consecuencia y tuma nan retiro.


12 maart 2015

Expresionnan haci den e articulo aki no necesariamente ta refleha opinion di ArenaPoliti.co