"Nos a haci un trabou aki y a bolbe pa scucha kico mas mester wordo mehora" 

ORANJESTAD - "Mi ta hopi contento di ta bek na Yuwana Morto Complex. Sigur ora cu nos ta bek den un bario unda cu algun aña atras nos a haya den un situacion hopi bandona, deteriora, unda no tabatin caminda ni luz y casnan tabata den situacion deplorabel sin cura," asina Prome Minister Mike Eman a cuminsa duna su declaracion na final di e Accion di Bario di tur siman, cu e biaha aki a tuma luga na Yuwana Morto Complex.

Na momento cu e Gobierno lidera pa Prome Minister Mike Eman a cuminsa traha na 2009, den e vision tabata poni pa renoba bario, principalmente esunnan cu a wordo lubida pa hopi aña, manera Yuwana Morto Complex, na Savaneta y Pos Chiquito.

"E tabata un situacion hopi tristo cu nos a topa cune hopi aña pasa. Basa riba e concepto di un miho calidad di bida, a desaroya pensamentonan pa reactiva e barionan cu mas a sufri durante añanan di negligencia. Yuwana Morto tabata un di nan. No solamente nos a articula un vision con renoba e bario, pero den e bario mes tabatin miembronan di e Comision Vision Nobo di Yuwana Morto cu a contribui grandemente cu ideanan pa logra e bario cu nan ta desea."

Tur esaki tabata parti di e vision di Gobierno di Gabinete Mike Eman I pa renoba barionan rond Aruba, bou di cual a renoba varios caba y otronan ta sigui bou di e actual gobernacion. Esaki pa logra un miho calidad di bida pa e ciudadanonan.

E mandatario tabata feliz di mira e habitantenan contento cu nan cas. El a bisa, cu e por compronde algun keho cu e habitantenan tin y cu a wordo expresa na dje. "Nos ta contento cu por lo general e habitantenan ta contento cu nan bario nobo, pero e renobacion mester sigui."

Accion di Bario ta pa laga e ciudadanonan sinti cu no ta un biaha Gobierno a pasa, a haci e trabou, pero Gobierno su atencion ta keda continuo pa e barionan na Aruba. "Nos ta enfatisa esaki cu accionnan, manera nos ta haci den e bishitanan di tur diahuebs, dunando e ciudadanonan un man pa deshaci di sushi," Prome Minister Eman a bisa.

Na final el a expresa cu semper lo tin deseo, pero ora cu un bario tin un organisacion y FCCA tin un structura pa scucha e deseonan, esaki lo mira mehoracion continuo.

Expresionnan haci den e articulo aki no necesariamente ta refleha opinion di ArenaPoliti.co