Cu e dicho “The proof of the pudding is in the eating” professor Bakker di CFT a termina e charla riba finanzas publico di Aruba na Universidad di Aruba siman pasa diabierna. Aki sr Bakker a referi na e plan ambicioso di Gabinete Eman yama Balanced Budget Akkoord y hunto cu esaki e 24 medida cu Gabinete Eman lo implementa pa drecha e finanzas publico di nos Pais. Segun CFT, e plan ta bunita, pero nan kier wak su implementacion. Pesey tambe e uso di e dicho, ya cu te ora cu Gabinete Eman tuma e medidanan nan lo demostra si berdad nan tin intencion pa drecha e finanzas publico di nos Pais. Minister Eman mester mustra Hulanda awor cu e por cumpli cu su mesun palabra.

Minister Eman no por bula pipa mas
Un gran ausente durante e charla tabata nos Minister President Eman. Pero tabata di spera ya cu di basta tempo Minister Eman ta core pa evita di papia riba e supervcion di CFT cu e mes a firma y bay di acuerdo cune. Asina nos ta mira cu e mandatario a bula bay Merca pa evita di atende cu sr Van Zwol, Secretario di Estado Hulandes encarga cu asunto di Reino. No ta pornada cu den su ultimo rapport CFT a recomenda pa Minister Eman tuma ‘ownership’ y bay na cabes di un comicion cu mester percura pa e medidanan cu su mesun Gobierno a propone, wordo ehecuta conforme Gabinete Eman su mesun plan. CFT mescos hopi di nos a mira caba cu Minister Eman no tin curashi pa bay drecha e desaster cu e mes a haci. E mandatario kier keda hunga ‘mooi weer’ cu placa di Pueblo y pesey Hulanda ta enfrente awor cu supervicion di CFT pa corta su hala y caba cu su maneho di fiesta cu placa di Pueblo. Minister Eman no por bula pipa mas.

Confrontacion cu CFT
Otro gran ausente durante e charla di CFT tabata Baba Herde, Lider di Fraccion di AVP den Parlamento. Baba desde 2010 a apoya tur e protocolnan cu Minister Eman a firma cu Hulanda den cual e supervicion di CFT tabata forma parti implicito. Baba ta e unico parlamentario cu a firma e Balanced Budget Akkoord y a bay di acuerdo hunto cu demas miembro di su fraccion cu e 24 medida riba Pueblo cu tabata hinca den e presupuesto di 2014 di nos Pais. Anto awor cu CFT a bira un realidad basa riba e palabracionnan di GEEN BEZWAAR di Gabinete Eman cu Hulanda, ata Baba kier sapatia y busca confrontacion cu CFT. Pero awor a yega ora cu Baba mester asumi su responsabilidad pa su falta di control riba Gabinete Eman. Baba no por keda core pa e realidad buscando tur forma pa plak CFT riba opocicion. Tur tempo Baba a gaba cu e bon relacion cu Hulanda y awe nan a manda CFT pe tambe. Pues awor Baba tin cu deal cu CFT na un manera sportief y stop di busca confrontacion pa e no caba di malogra e Pais aki.

Cumpli awor
The proof of the pudding is in the eating. Minister Eman y Baba tur tempo a papia bunita y traha plan bunita pa lombra wowo di Pueblo y Hulanda. Pues awor nan tempo a yega pa nan implementa nan plan y CFT lo percura pa nan cumpli cu nan mesun palabra.

5 maart 2015

Expresionnan haci den e articulo aki no necesariamente ta refleha opinion di ArenaPoliti.co