Pueblo merece di haya sa e berdad di kiko a bai robes tras di hedging y kendenan ta responsabel 

Oranjestad, Aruba, Parlamento di Aruba a trata algun simanan atras e actividad cuestionabel di “hedging” na WEB, cu a pone cu apesar cu prijs di crudo a baha considerablemente den ultimo lunanan, consumidornan di coriente na Aruba no por a nota un rebaho den prijs di coriente como consequencia di rebaho di prijs di crudo. Nos fraccion a expresa for di un comienso cu nos lo no bai keda trankil te ora nos haya mas claridad den e caso aki. Den cuadro di esaki dos siman pasa nos fraccion a hasi entrega di un carta official na presidente di parlamento pa laga Algemene rekenkamer hasi un investigacion profundo relaciona cu e caso di hedging cu a costa pueblo un reduccion di tarifanan di utilidad.

Realidad ta cu e rapport presenta door di Price Waterhouse Coopers no tawata completo. Es mas for di e propio rapport bo por constata cu Price Waterhouse Coopers tabata hopi limita den nan tareanan. De facto e limitacion tawata debi cu a cubri solamente un parti chikito di e proceso di hedging, esta solamente internamente den WEB. Siendo cu e proceso ta mucho mas amplio, e ta cuminsa na e team di hedging na WEB, pero ta envolvi tambe directiva di WEB, hunta di comisario di WEB, directiva di Utilities, hunta di comisario di Utilities y gobierno, especialmente Mike de Meza y Mike Eman.
A base di loke nos a menciona nos mocion encera instrui Algemene Rekenkamer Aruba pa hasi un investigacion profundo, teniendo cuenta cu e proceso completo di hedging na WEB, Utilities y Gobierno di Aruba, y informa Parlamento dentro di dos luna di e resultadonan di e investigacion.

AVP a vota CONTRA
Lamentablemente e fraccion berde a vota contra e mocion aki cu un cantidad di excusa. Segun parlamentarionan di AVP ya nan a pidi gobierno hasi investigacion y pesey nan no kier pa Algemene Rekenkamer hasi e investigacion. Y pesey nan a vota contra e mocion, mustrando asina nan temor pa wordo investiga.

Expresionnan haci den e articulo aki no necesariamente ta refleha opinion di ArenaPoliti.co