Gabinete ME II: Minister Bermudez a ricibi rapport positivo di Fitch cu rating BBB- pa Aruba
ORANJESTAD – Recientemente Minister di Finanzas, Angel Bermudez a ricibi e ‘ratings’ di Fitch cu a cualifica Aruba como ‘BBB-‘. Esaki ta indica cu e expectativa di riesgo ‘non-payment’ ta abou mientras cu e capacidad di pago di compromisonan financiero ta wordo considera adecua, sin embargo condicionnan economico por afecta e capacidad aki.
Algun di e factornan cu peso pa e ‘rating’ positivo aki segun e expertonan di Fitch ta entre otro, e crecemento di e PIB real cu un 1,1% den 2014, pues nan ta spera tambe un crecemento aproxima di 2% den 2015 y 2016, cu tambe ta cuadra cu e prevision di Banco Central y Ministerio de Finanzas tambe.
Sin laga afo tambe e crecemento di e divisanan cu un 8.5% danki na e sector turistico. Fitch no por a laga un banda e reforma di pensioen cu e tuma luga aña pasa cu a mehora e sostenibilidad di Aruba su finanzas publico pa un termino largo.
Na mes momento entre algun di e factornan cu por afecta e ‘rating’ y mehora esaki ya sea individualmente of colectivamente ta lo siguiente, un consolidacion fiscal exitoso cu lo traduci den disminucion di e deficit presupuestario y cu lo por carga e deuda publico como tambe e ehecucion di un infrastructura superior basa riba inversion priva cu por trece cun’e un trayectoria sostenibel y mas rapido den crecemento.
Segun e mandatario di Finanzas, e ratingnan aki di institutonan internacional manera Fitch, ta un bon indicacion si tur cos ta riba e ruta corecto of no, pues e rating y recomendacionnan semper mester wordo tuma na serio. “Semper tin espacio pa mehora, nos a consolida cu e rating anterior pues esaki ta significa cu e situacion financiero di Aruba no a detereora ”, Minister Bermudez a expresa.
Expresionnan haci den e articulo aki no necesariamente ta refleha opinion di ArenaPoliti.co