Awe marduga, Parlamento a aproba dos ley. E prome ta trata pensioen di ambtenaar, enserando entre otro un aumento di edad di pensioen pa ambtenaar pa 65 aña, y un injeccion den e fondo di APFA pa haci e cobertura 100%. E di dos ley ta trata un aumento (1%) di BBO, destina pa cubri fondonan di AZV (health tax). Ambos ley a wordo aproba cu 12 voto na fabor y 8 contra. Tur voto na fabor a bin for di fraccion AVP, mientras cu MEP y PDR a vota contra. Sra. Mervin Wyatt-Ras tawata ausente.

 

 

AVP
Parlamentarionan di AVP a bisa di ta orguyoso di gabinete Mike Eman. E fraccion ta di opinion cu fondonan di APFA y AZV a wordo salba, y cu a tuma curashi pa implementa e aumentonan. Nan ta considera e desicion uno responsabel y sostenibel. Ademas a wordo bisa cu loke a wordo trata, ta poni den e programa di partido di AVP di eleccion 2013.
Segun minister presidente Mike Eman, e aumentonan no ta consecuencia di un supuesto mal maneho financiero di su gabinete manera oposicion ta bisa, pero ta algo structural y tin di haber cu sostenibilidad.

PDR
Parlamentario Andin Bikker a bisa di a protesta banda di partido AVP contra BBO, y ainda ta contra. E ta na fabor di un reforma fiscal completo y no e diferente medidanan cu ta wordo introduci un pa un pa cubri cierto gasto. E ta considera e maneho actual un maneho 'ad hoc'.

MEP
Miembronan di fraccion MEP ta di opinion cu e aumentonan menciona no lo ta necesario si gabinete Mike Eman I y II a goberna nos pais den un forma responsabel. Segun MEP, AVP ta tira culpa riba gabinete Oduber III y IV (2001-2009), sin mira e realidad di e daño cu nan mes a causa e ultimo 5 añanan. Sr. Mike Eman lo a manipula Pueblo pa gana eleccion, y despues di a priminti di elimina BBO, awo ta aument’e.

Mocion
Fraccion AVP a entrega dos mocion cu ta regarda e sostenibilidad di gastonan di AZV y cuido medico en general. E mocionnan a wordo aproba cu 12 voto na fabor, y for di oposicion 8 voto contra.
Sr. Andin Bikker a entrega un mocion cu ta urgi gobierno pa haci un estudio di factibilidad, hunto cu AZV, pa sondea e posibilidad pa introduci un of mas 'hyperbaric chambers', pa por ehempel hospital HOH. E mocion a wordo aproba unanimamente.