ORANJESTAD – Den un ceremonia cortico pero importante, Gobierno di Aruba, Aruba Airport Authority y FDA (Fundacion Desaroyo Arubano) a firma un contract cu Vision Box pa compra y instalacion di e portanan automatico pa procesa pasaheronan (Happy Flow Project) na Aeropuerto International Reina Beatrix. 

E Happy Flow Project ta hopi mas cu solamente e control automatico na frontera y ta encera henter e trayecto cu e pasahero ta pasa aden for di momento cu e check-in te momento cu e aborda su avion. E sistema di mara tur e fasenan aki na otro via e uzo continuo di e sistema biometrico, ta unico pa cada pasahero.

Prome Minister Mike Eman, kende hunto cu su colega di Finanza Angel Bermudez a firma den nomber di Gobierno di Aruba, ta hopi satisfecho cu Aruba a logra introduci e sistema aki, como e  promenan na mundo. “E ta un paso mas cerca di nos meta pa logra haci Aruba un hub den Caribe,” Eman a bisa.

E compania cu a haya e proyecto aki ta uno di Portugal, Vision Box, cu a wordo representa pa Bento Correia. Otronan cu a firma e acuerdo diabierna atardi ta Jurgen Benschop di AAA; James Fazio di AAA y Edwin Roos di FDA. Vision Box tin experiencia internacional den entrega di portanan automatico na frontera y a instala portanan similar na Schiphol, Londen y Sao Paolo. Prome Minister Eman a expresa cu Gobierno ta spera cu pa fin di luna aki ta asina leu cu por cuminsa ehecuta e proyecto cu ta e prome di su tipo y un primicia. Henter ehecucion di e proyecto lo dura rond di dos aña.

E proyecto aki a wordo financia door di Gobierno via di FDA. Minister Otmar Oduber no por tabata presente pa e firmamento ya cu e tabata den Parlamento defendiendo su presupuesto di 2015.

Expresionnan haci den e articulo aki no necesariamente ta refleha opinion di ArenaPoliti.co