ORANJESTAD --   Lider di MEP Evelyn Wever-Croes den conferencia di prensa semanal di MEP a elabora riba e aumento di tarifa di BBO, y na mes momento cu ta baha e prima di AZV cu 1%.

“AVP kier ganjabo cu e aumento di BBO lo no causa ningun impacto pasobra nan a baha bo prima di AZV. Na prome lugar, eynan bo ta mira cu e parlamentarionan di AVP a perde tur contacto cu realidad, pasobra no ta tur hende ta gana suficiente pa paga e prima di AZV, pero TUR hende mester paga e aumento di BBO si!

Ademas, nan kier pa bo kere cu awor ta masha compensacion nan ta dunabo cu e reduccion di e prima aki, pero ta algo cu nan mes a ranca di bo 4 anja pasa. Na anja 2011 Mike Eman a pasa un aumento di 2% di prima di AZV, anto awe e kier bin dunabo 1% so bek.




Si di berdad bo kier duna pueblo un compensacion, duna pueblo reduccion di 3%!

Ta importante pa tur hende realisa cu e aumento di BBO lo tin un impacto grandi riba e cartera di tur hende. No tin control di prijs den supermercado, y pues prijsnan lo subi hopi mas cu 1%. Ademas, e introduccion di e BBO ta e siman aki, y pa e siman aki ningun hende a haya e reduccion di prima AZV ainda.

Locual mas mi ta lamenta ta cu e medida aki ta bai causa hopi dolor especialmente cerca esnan cu awor caba tin’e hopi dificil. Esnan cu awor caba placa no ta yega pa nan paga nan recibonan di awa y coriente, esnan cu awor caba placa no ta yega pa nan paga schoolgeld pa nan yiunan. Nan ta esunnan cu lo wordo mas afecta pa e medida cruel aki. Ainda mi no ta comprende dicon Mike Eman no ta stop di biaha poco, stop di fiesta poco, manda dos minister cas y duna poco di e placa ey na yuda esnan mas vulnerable den nos comunidad. Mike Eman ta prefera di pone henter pueblo hala faha mara, basta e y su ministernan y amigonan por sigi fiesta. Mike Eman no tin curason pa e pueblo di Aruba” Lider di MEP Evelyn Wever-Croes a duna di conoce.

Expresionnan haci den e articulo aki no necesariamente ta refleha opinion di ArenaPoliti.co