A para deterioro di un hoya di edificio cu hopi historia alegre pa famia y pa hopi riba nos isla 

Dialuna mainta a firma un acuerdo oficial pa rescata e edificio Residencia Veneranda mihor conoci como ex-Papiamento Restaurant. Minister Oduber ta reconoce cu ta trata aki di un edificio, un cas cu un historia particular cu a pasa di generacion pa generacion di e famia cu tabata biba aden. Un famia cu a haci hopi trabou pa percura cu e raiz di e cas por wordo manteni mas cu ta posibel, apesar di e cantidad di añanan y incidentenan cu a percura pa un decadencia hopi grandi di e edificio. Un edificio mey mey di nos centro di cuidad caminda nos bishitantenan por mira esaki, pero mas cu tur nos propio hendenan cu ta recorda e balor di e propiedad aki, di tur locual e la significa den historia di nos isla.

Den cuadro di e desaroyo di revitalisacion di nos centro di cuidad tin un atencion special pa maneho di nos monumentonan. Minister Oduber ta comenta: “Na momento cu mi a asumi e responsabilidad, nos a expande e vision y posibilidadnan pa cu e maneho di monumentonan riba nos isla, di con por rescata y mantene pa percura cu e joyanan aki cu ta parti di nos historia no bay perdi. Cada un di e edificionan, no solamente pa e balor di arkitectura cu nan tin, pero tambe cada edificio cu tin asignatura cu ta forma parti di ta concidera un monumento, tin un historia hopi bunita y rico su tras cu nos kier percura cu esaki keda manteni tambe. Esaki ta un cu sigur nos ta mira cu tin un balor hopi grandi.”

A inicia cu e proseso casi un aña pasa na un forma hopi intensivo, despues di varios combersacion cu e famia, despues cu por a mira varios incidentenan indesea pa e propiedad, porfin awor ta yega na un solucion. Ta firma un acuerdo entre Monumenten Fonds cu famia representa pa Sra. Landa Ras-Merryweather. E acto a tuma lugar mey mey di jiu, nieto, bisa nieto y te hasta tatara nieto cu tabata tey presente pa demostra e historia bibo y sentimentonan fuerte pa cu e edificio aki. Como un famia asina grandi no ta facil pa tur bai di acuerdo cu un pensamento pero Sra. Landa a logra esaki. Cu un taxatie rapport hopi mas halto, e famia a tira awa den biña pa por salba e edificio pa comunidad di Aruba.

Minister Oduber agradecido na e famia ta comenta “E meta principal ta cu nos ta rescata un edificio cu un historia asina rico pa locual ta trata informacion y locual e la significa den pasado, tambe pa esnan cu a biba den e hogar aki pero adicional na tur esaki pa e totalidad di restauracion cu ta tumando lugar den nos centro di cuidad.”

E acuerdo ta un principio cu ta duna e opcion primordial na Monumenten Fonds pa por yega na un acuerdo di compra di Residencia Veneranda. Ya caba a cuminsa delibera riba e futuro uso di e edificio cual no ta difini ainda. Sr. Oduber ta reitera y finalisa bisando: “Locual si ta difini ta cu kier restaura e edificio, kier restaure den su forma original y percura cu atraves di Monumenten Fonds e haya e mihor uso cu por tin den e futuro nos dilanti. Nos ta salvaguardia historia, nos ta salvaguardia locual ta di nos, nos cultura, pero mas cu tur cos nos ta perserve pa nos por traspase pa nos futuro generacionan.”

Expresionnan haci den e articulo aki no necesariamente ta refleha opinion di ArenaPoliti.co