Mi por a tuma nota di algun declarashonan y expreshonnan cu partido MEP ta purbando di lanta pueblo ala estilo augustus 1977 pa asina obliga pa Gobierno baha. Un Gobierno eligi democraticamente cu 13 asiento pa mas di 33 mil votadornan.
Na promer lugar ora mi tende e argumentonan pa cu esaki ta yenami cu indignashon y preocupashon den ki peliger nos estado di derecho ta bayendo cu mentalidadnan asina ala estilo di Machiavelli. Pa esnan cu no sa e palabra Machiavelli, esaki ta di e filosofo Niccolo Machiavelli y su filosofia ta basa riba e hecho cu si un forza o organisashon politico aheno
kier yega na poder, no ta importa ki metodonan mester wordo usa. Contal bo logra bo meta di yega na poder. Kiermeen aki ta hasi uso di manipulashon, menasanan, engaño, destrucshon,, intimidashon etcetc...pa por yega na poder. Y esakinan netamente ta refleha e actitud y postura di esnan di partido MEP y su grupo di 7 y demas otro gruponan minoria.
Biniendo bek riba e sucedidonan y accionnan di augustus 1977, aki claramente por conclui esnan di MEP ta manipula cu e origen y motibonan pa loucal esaki a tuma lugar na 1977, cu e unico meta pa purba lanta e pueblo actual contra Gobierno di Aruba.
Pa cuminsa e accionnan di 1977 tawata basa riba e hecho cu partido MEP den gobierno e tempo ey a haya 5 asiento di e 8 asientonan durante eleccion na juni 1977 anto e formador e tempo ey, esta sr. Rozendal di partido Democrat a laga partido MEP afor. Aki no a respeta e desishon di pueblo cual democraticamente a duna MEP mayoria anto pa es motibo aki sindicatonan y otro organisashonnan a bay den accion den luna di augustus 1977. Durante e akshonnan aki Gobierno e tempo ey forma cu partido PPA a manda Riot Commando riba esnan cu tawata protesta. Anto tristo pa bo wak ta ken esnan di MEP ta brasa awe...e mesun partido PPA.
Defunto Betico Croes d.f.m. mester ta bolter den su caha ora e ta wak e partido cu e la funda ta tene man cu e partido cu a laga detene y sere y a manda riot commando riba esnan cu tawata protesta. Hamas Betico Croes d.f.m. a considera AVP su enemigo y hasta tawata un bon amigo di defunto Shon A. Eman d.f.m.. Pero manera semper e MEP di sr. Nelson O. Oduber y Evelyn mester troce y manipula cu historia y e berdad. Kiermeen aki claramente kier usa e sucedidonan di augustus 1977 pa bay encontra di Gobierno cu na 2013 a keda eligi democraticamente cu 13 asiento. No ta respeta e mayoria di nos pueblo votador y esaki ta netamente pakiko e accionnan na augustus 1977 a tuma lugar pasobra no a respeta e mayoria di e pueblo votador e tempo ey. Asina por conclui cu MEP actualmente ta bay linja recta contra e espirito di e lucha y accionnan di augustus 1977, di usa e hechonan aki pa baha un Gobierno democraticamente eligi pa mayoria di pueblo. Aki simplemente ta un falta di respet na esnan cu di curason y honestidad a lucha na augustus 1977.

Expresionnan haci den e articulo aki no necesariamente ta refleha opinion di ArenaPoliti.co